Ájiniyaz atındaǵı Nókis mámleketlik pedagogikalıq institutında jaslar sanasında salamat dúnyaǵa kózqarastı qáliplestiriw, olardı hár qıylı jat ideya hám zıyanlı aǵımlardan qorǵaw, sonday-aq, puqaralıq juwapkershiligin kúsheytiw maqsetinde «Men diniy ekstremizm hám terrorizm qáwpin qalay túsinemen?» atamasında ushırasıw bolıp ótti.

Ushırasıwǵa Ózbekstan Respublikası Din isleri komiteti Qaraqalpaqstan Respublikası aymaqlıq basqarmasınıń hayal-qızlar máseleleri boyınsha jetekshi qánigesi Húrayım Ibraimova, usı basqarmanıń bas qánigesi Xudaybergen Nezamatov, Qaraqalpaqstan Respublikası Ishki isler ministrligi xızmetkeri Fayz Quwandıqov, dekan orınbasarları, tyutorlar hám student-jaslar qatnastı.

Ilajda qánigeler diniy ekstremizm hám terrorizmniń jámiyetlik rawajlanıwǵa payda etetuǵın unamsız aqıbetleri, usı sıyaqlı qáwiplerdiń tiykarǵı mazmunı, olardıń jaslar sanasına tásir etiw usılları, sonday-aq, internet hám sociallıq tarmaqlar arqalı tarqatılıp atırǵan zıyanlı ideyalardıń qáwpi haqqında túsinikler berdi.

Sózge shıqqanlar ekstremizm hám terrorizmniń din menen hesh qanday baylanısı joq ekenligin, kerisinshe, buzǵınshı kúshler tárepinen din nıqabı astında ámelge asırılıwı turmıslıq mısallar arqalı túsindirildi.

Qatnasıwshılar óz pikirlerin bildirip, tema dógereginde ózlerin qızıqtırǵan sorawlarǵa qánigelerden anıq juwaplar aldı.

NMPI baspasóz xızmeti.