Ájiniyaz atındaǵı Nókis mámleketlik pedagogikalıq institutında 2026-2027-oqıw jılında jańadan 60610500 – Jasalma intellekt hám 60220600 – Antropologiya hám etnologiya bakalavr tálim baǵdarları jáne 70110104 – Úlkenler tálimi (andragogika), 70111102 – Social-gumanitar pánlerdi oqıtıw metodikası (huqıq tálimi), 70220301 – Tariyx magistratura qánigelikleri ashılıwı názerde tutılǵan.

Búgingi kúnde bul tálim baǵdarları hám qánigelikler ishki bahalaw procesinen ótkerilip, Ózbekstan Respublikası Prezidenti Administraciyası janındaǵı Bilimlendiriwdiń sapasın támiyinlew milliy agentligine sırtqı bahalawdan ótkeriw ushın tiykarlawshı hújjetler jiberilgen.

Sonnan:

1) 60610500 – Jasalma intellekt bakalavriat tálim baǵdarınıń qánigelik talabı boyınsha pitkeriwshileri bolajaq oqıtıwshılardı tereń texnikalıq bilim, pedagogikalıq sheberlik hám innovaciyalıq pikirlewge iye bolıwı ushın tayarlaydı. Bul baǵdar olarǵa jasalma intellekt hám robototexnika boyınsha bilim beriw jáne bul texnologiyalardı ámeliy qollanıw imkaniyatların jaratadı.

Pitkeriwshiler jasalma intellekt, robototexnika hám intellektual sistemalardıń tiykarǵı baǵdarları boyınsha tereń bilimge iye boladı hám bul bilimlerdi bilimlendiriw ámeliyatına nátiyjeli integraciyalay aladı.

2) 60220600 – Antropologiya hám etnologiya bakalavriat tálim baǵdarınıń qánigelik talabı boyınsha pitkeriwshileri Ózbekstan Respublikası Ilimler akademiyası institutlarında, huqıq qorǵaw uyımları, mámleketlik qáwipsizlik uyımları, jergilikli ózin-ózi basqarıw uyımları hám orınlardaǵı ruwxıylıq hám aǵartıwshılıq oraylarında, sonday-aq, bakalavriat tálim baǵdarı boyınsha pitkeriwshiler pedagogikalıq qayta tayarlıqtan ótken jaǵdayda, kásiplik bilimlendiriw mákemelerinde bilimlendiriwdiń wákillikli basqarıw uyımları tárepinen anıqlanatuǵın ulıwma kásiplik hám qánigelik pánlerdi oqıtıw boyınsha pedagogikalıq jumıs penen shuǵıllanıw huqıqına iye boladı.

3) 70220301 – Tariyx magistratura qánigeliginiń qánigelik talabı boyınsha pitkeriwshileri joqarı bilimlendiriw, qayta tayarlaw hám qánigeligin arttırıw, kásiplik hám ulıwma orta bilimlendiriw mákemelerinde pedagogikalıq jumıs, Ilimler akademiyası hám tarmaq ilimiy-izertlew institutları jáne joqarı bilimlendiriw mákemeleriniń ilimiy-izertlew bólimlerinde, Mámleketlik statistika komitetiniń bólimlerinde, puqaralıq halatı aktlerin jazıw bólimlerinde, arxiv mákemelerinde, milliy mádeniy oraylarda jáne mámleketlik hám jergilikli basqarıw uyımlarında islew huqıqına iye.

4) 70110104 – Úlkenler tálimi (andragogika) magistratura qánigeliginiń qánigelik talabı boyınsha pitkeriwshileri qosımsha túrde joqarı bilimlendiriw mákemelerinde qánigelikke baylanıslı pánlerdi oqıtıw, ilimiy-izertlew jumısları menen shuǵıllanıw, sáykes bilimlendiriw baǵdarları boyınsha bilimlendiriwdi ámelge asırıwshı ministrlikler, onıń tarmaq basqarmaları hám mákemelerinde processti joybarlastırıw hám basqarıw sıyaqlı kompleksli máseleler kompleksin qamtıp aladı.

5) 70111102 – Social-gumanitar pánlerdi oqıtıw metodikası (huqıq tálimi) magistratura qánigeliginiń qánigelik talabı boyınsha pitkeriwshileri joqarı bilimlendiriw, qayta tayarlaw hám qánigelik arttırıw, kásiplik bilimlendiriw mákemelerinde pedagogikalıq jumıs, Ilimler akademiyası hám tarmaq ilimiy-izertlew institutları hám orayları, sonday-aq, bilimlendiriwdiń sapasın monitoring etiw bólimlerinde hám t.b. jumıs islew imkaniyatına iye.