Búgin, 26-mart kúni Ájiniyaz atındaǵı Nókis mámleketlik pedagogikalıq institutında Nawrız ulıwma xalıqlıq bayramına baǵıshlanǵan «Nawrızdı ulıǵlaw – insandı ulıǵlaw!» atamasındaǵı teatrlastırılǵan muzıkalı-xoreografiyalıq koncert baǵdarlaması bolıp ótti.

Ilajǵa Qaraqalpaqstan Respublikası Joqarǵı Keńesi hám Ministrler Keńesi, ministrlikler jáne shólkemlerdiń juwapkerleri, joqarı oqıw orınlarınıń basshıları, belgili ziyalılar, ilimpazlar, professor-oqıtıwshılar, student-jaslar, sonday-aq, institut átirapındaǵı máhállelerdiń turǵınları, keń jámiyetshilik hám ǵalaba xabar quralları wákilleri qatnastı.

Bayram ilajında institut rektorı wazıypasın waqıtsha atqarıwshısı Quvondiq Qodirov sózge shıǵıp, barlıq qatnasıwshılar hám miymanlardı ulıstıń ullı kúni, shıǵıs xalıqlarınıń jańalanıw hám jasarıw áyyamı – Nawrız bayramı menen qutlıqladı.

Teatrlastırılǵan koncert baǵdarlamasında instituttıń «Tumaris» qosıq hám ayaq-oyın xalıq ansambli, «Sıy perde», «Tarannum», «Baldáwren» hám basqa da ansamblleri, «Turan» teatr-studiyası, sonday-aq, bir topar talantlı studentler, magistrantlar, institut pitkeriwshileri tárepinen milliy úrp-ádetler, dástúrler sáwlelengen saxnalıq kórinisler, qosıqlar, ayaq-oyınlar atqarılıp, milletler aralıq tatıwlıqtı jırlaytuǵın qaraqalpaqsha, ózbekshe, qazaqsha, túrkmenshe, qırǵızsha, russha, sonıń menen birge, klassikalıq qosıqlar atqarıldı hám jıynalǵanlarǵa bayram keypiyatın inám etti.

NMPI baspasóz xızmeti.