Ájiniyaz atındaǵı Nókis mámleketlik pedagogikalıq institutı rektoratı hám kásiplik awqamı komiteti arasında dúzilgen jámáátlik shártnamanıń 2025-jıldaǵı orınlanıwın kórip shıǵıw, sonday-aq, 2026-2028-jıllarǵa mólsherlengen jámáátlik shártnamanı tastıyıqlawǵa arnalǵan konferenciya shólkemlestirildi.

Konferenciyaǵa Ózbekstan kásiplik awqamları Federaciyasınıń Qaraqalpaqstan keńesi baslıǵı U.Jalmenov Ózbekstan bilimlendiriw hám ilim xızmetkerleri kásiplik awqamı Qaraqalpaqstan Respublikası boyınsha juwaplı shólkemlestiriwshisi R.Abduraxmanov, institut rektorı w.w.a. Q.Qodirov, sonday-aq, institut fakultetleri, kafedralar hám bólimlerden delegatlar qatnastı.

Konferenciya kún tártibindegi máseleler boyınsha shıǵıp sóylewshiler tárepinen delegatlarǵa tolıq maǵlıwmatlar berildi.

Atap ótilgenindey, házirgi waqıtta instituttıń kásiplik awqamı kommiteti aǵzaları sanı 14 925 adamdı quraydı. Sonnan 1131 professor-oqıtıwshı hám xızmetkerler, 13 794 studentler bolıp esaplanadı.

Kásiplik awqamı komiteti institut xızmetkerleri hám studentlerin xoshametlew komissiyasına aǵza bolıp, usı komissiya arqalı materiallıq hám ruwxıy xoshametlew, miynetti qorǵawdı shólkemlestiriw hám orınlanıwın qadaǵalawda qatnastı, instituttıń ishki tártip-qaǵıydaların túsindiriw jumısların alıp barıp, xızmetkerlerdiń jumıs ornı qısqartılıwı boyınsha komitettiń aldın ala kelisimi alınıwı jolǵa qoyıldı.

Ótken jıllar dawamında 61 xızmetker sociallıq qamsızlandırıw qorı esabınan, 106 xızmetker kásiplik awqamı tólemi qarjıları esabınan respublikalıq dem alıw hám salamatlıǵın tiklew oraylarında bolıp qayttı.

Jıl dawamında barlıq bayram sáneleri kúnleri tańlawlar, sport jarısları, dógerek sáwbetleri, ushırasıwlar, oqıw seminarları shólkemlestirilip, kásiplik awqamı komiteti tárepinen qarjılandırılıp barıldı.

Sonıń menen birge, jámáátlik shártnama tiykarında xızmetkerlerdiń jumıs sharayatların jaqsılaw, aylıq miynet haqısın óz waqtında beriw, miynetti qorǵaw hám texnikalıq qáwipsizlik ilajların jolǵa qoyıw, studentlerdiń oqıw sharayatların jaqsılaw hám stipendiyaların óz waqtında beriw baǵdarında da unamlı jumıslar ámelge asırıldı.

Konferenciyada delegatlar tárepinen 2026-2028-jıllarǵa mólsherlengen jámáátlik shártnama tastıyıqlandı hám kún tártibindegi máseleler boyınsha tiyisli qararlar qabıl etildi.

NMPI baspasóz xızmeti.