Ájiniyaz atındaǵı Nókis mámleketlik pedagogikalıq institutında pitkeriwshi kurs studentleriniń bántligin támiyinlew hám olardıń isbilermenlik baslamaların qollap-quwatlawǵa baǵdarlanǵan «Keleshekke qádem» baǵdarlaması sheńberinde gezektegi seminar-trening shólkemlestirildi.

Ilajǵa «Ózmilliybank» akcionerlik jámiyeti «Keleshekke qádem» karyera rawajlanıw hám metodologiya bólimi joybar menedjeri N.Matkurbanov, jámiyettiń Qaraqalpaqstan Respublikası filialı qánigesi K.Sharipova, instituttıń registrator ofisi baslıǵı B.Tólepov, «Keleshekke qádem» orayı baslıǵı N.Tańbaev, pitkeriwshi kurs studentleri qatnastı.

Seminardıń tiykarǵı maqseti – pitkeriwshi jaslardı miynet bazarına tayarlaw, olardıń kásiplik kónlikpelerin bekkemlew, jumısqa ornalasıw procesinde zárúr bolatuǵın bilim hám kónlikpelerdi qáliplestiriw hám isbilermenlik jumısların baslawǵa kómeklesiwden ibarat.

Seminar-trening dawamında qánigeler tárepinen miynet bazarında talap joqarı bolǵan kásip hám baǵdarlar, biznes reje islep shıǵıw tiykarları, startap joybarlardı jolǵa qoyıw hám qarjılandırıw imkaniyatları, jeńillikli kreditler hám mámleketlik baǵdarlamalar haqqında tolıq maǵlıwmatlar berildi.