Ájiniyaz atındaǵı Nókis mámleketlik pedagogikalıq institutı Tábiyiy pánler fakultetinde student-jaslardıń ana tábiyatımızǵa bolǵan mehir-muhabbatın arttırıw, ekologiyalıq mádeniyat hám qorshaǵan ortalıqtı qorǵaw juwapkershiligin ele de kúsheyiw maqsetinde «Quslar hám gúllerdi qorǵayıq» atamasındaǵı bayram keshesi bolıp ótti.

Keshede fakultet dekanı Qarjawbay Reymov sózge shıǵıp, ana tábiyatımızda, elimizdiń biologiyalıq kóp túrliliginde quslar jáne gúllerdiń ornı, olardı qorǵawdıń áhmiyeti, mámleketimizde ámelge asırılıp atırǵan ekologiyalıq reformalar haqqında aytıp ótti.

Xalıqaralıq ornitologlar awqamınıń sońǵı maǵlıwmatlarına qaraǵanda dúnyada 11 mıńnan aslam qus túri dizimge alınǵan bolsa, 1500-jıldan házirgi kúnge shekem antropogen tásirler aqıbetinde 160 túr ulıwma joq bolıp ketken. Búgingi kúnde 1200 qus túri joq bolıp ketiw qáwpi astında qalmaqta.

Qaraqalpaqstan Respublikası faunasında quslardıń 319 túri dizimge alınǵan bolıp, sonnan 45 túr Ózbekstan Respublikasınıń Qızıl kitabına kirgizilgen. Xalıqaralıq tábiyattı qorǵaw awqamınıń Qızıl dizimine bolsa elimizdegi quslardıń 46 túri kirgizilgen.

Bayram keshesinde studentler gúllerdiń túrleri, olardıń ózgeshelikleri, paydalı tárepleri haqqında da maǵlıwmatlar berdi.

Ilaj studentler qatnasıwındaǵı tańlawlar, qızıqlı soraw-juwaplar, sonıń menen birge, instituttıń «Tumaris» xalıq ansambli, fakultettiń talantlı studentleri atqarıwındaǵı koncert baǵdarlaması, saxnalıq kórinisler menen dawam etti.

Ilaj sońında belsene qatnasqan studentler diplom hám sawǵalar menen sıylıqlandı.

NMPI baspasóz xızmeti.