Ájiniyaz atındaǵı Nókis mámleketlik pedagogikalıq institutı Mektepke shekemgi hám baslawısh tálim fakulteti mektepke shekemgi tárbiya hám defektologiya kafedrası tárepinen «Ayrıqsha bilimlendiriwge mútáj bolǵan balalardı oqıtıw hám tárbiyalawdıń zamanagóy tendenciyaları» atamasındaǵı xalıqaralıq ilimiy-ámeliy konferenciya shólkemlestirildi.

Konferenciya inklyuziv bilimlendiriwdi rawajlandırıw, ayrıqsha bilimlendiriwge mútáj bolǵan balalarǵa sapalı bilim hám tárbiya beriwdiń nátiyjeli mexanizmlerin islep shıǵıw, aldınǵı pedagogikalıq tájiriybelerdi keń en jaydırıw, xalıqaralıq birge islesiwdi keńeytiw maqsetinde ótkerildi.

Ilajdıń ashılıw plenar májilisin fakultet dekanı M.Allambergenova basqarıp bardı.

Oǵan Qaraqalpaqstan Respublikası Mektepke shekemgi hám mektep bilimlendiriwi ministrligi, Sociallıq qorǵaw milliy agentligi Qaraqalpaqstan Respublikası basqarmasınıń wákilleri, instituttıń jáne respublikamızdıń aldınǵı joqarı oqıw orınları, ilimiy orayları menen birge Rossiya Federaciyası A.I.Gercen atındaǵı Rossiya mámleketlik pedagogikalıq universiteti, Moskva xalıqaralıq mektepke shekemgi pedagogikalıq akademiyası, K.D.Ushinskiy atındaǵı Yaroslavl mámleketlik pedagogikalıq universiteti, Qazaqstan Respublikası Abay atındaǵı Qazaq milliy pedagogikalıq universitetinen professor-oqıtıwshılar, ilimpazlar qatnasıp, óz bayanatların oqıdı.

Konferenciyada inklyuziv bilimlendiriwdi engiziwdiń áhmiyetli máseleleri, arnawlı pedagogika hám defektologiya tarawındaǵı zamanagóy qatnaslar, sanlı texnologiyalardıń bilimlendiriw procesine integraciyası, sonday-aq, psixologiyalıq-pedagogikalıq qollap-quwatlaw sistemasın jetilistiriw máseleleri keń dodalandı.

Sonday-aq, konferenciya sheńberinde sekciya májilisleri shólkemlestirilip, onda qatnasıwshılar óz ara tájiriybe almasıw, innovaciyalıq metod hám texnologiyalardı ámeliyatqa engiziw boyınsha pikir-usınıslar bildirdi.

Ilaj juwmaǵında konferenciya rezolyuciyası qabıl etilip, onda ayrıqsha bilimlendiriwge mútáj bolǵan balalar ushın oqıtıwdıń sapasın arttırıw, olardıń sociallıq beyimlesiwin qollap-quwatlaw, pedagog kadrlardıń qánigeligin jetilistiriw jáne ilimiy-izertlew jumısların bunnan bılay da rawajlandırıwǵa baǵdarlanǵan áhmiyetli wazıypalar belgilep alındı.

NMPI baspasóz xızmeti.