Ájiniyaz atındaǵı Nókis mámleketlik pedagogikalıq institutında student-jaslar arasında salamat turmıs tárizin keń úgit-násiyatlaw, olardıń sportqa bolǵan qızıǵıwshılıǵın arttırıw hám sheber sportshılardı anıqlaw maqsetinde shólkemlestirilgen «Jańa Ózbekstan studentleri olimpiadası» sport jarıslarınıń voleybol sport túri boyınsha Qaraqalpaqstan Respublikası basqıshı bolıp ótti.

Jarısqa respublikamızdaǵı barlıq joqarı oqıw orınlarınıń student-qızlarınan quralǵan komandalar qatnasıp, jeńimpazlıq ushın kúsh sınastı.

Ilajda sózge shıqqanlar jaslardı fizikalıq hám ruwxıy jaqtan jetik etip tárbiyalawda sporttıń áhmiyetine toqtalıp, olardı turaqlı túrde sport penen shuǵıllanıwǵa shaqırdı hám jarısta áwmet tiledi.

Student-qızlar ózleriniń tayarlıǵı hám sport sheberliklerin kórsetiwge háreket etti.

Solay etip, jarıs juwmaǵında Ájiniyaz atındaǵı Nókis mámleketlik pedagogikalıq institutı komandası jeńimpaz boldı hám respublikalıq final basqıshına jollamanı qolǵa kirgizdi.

2-orındı Berdaq atındaǵı Qaraqalpaq mámleketlik universiteti, al sıylı 3-orındı bolsa Innovaciyalıq texnologiyalar universiteti komandaları iyeledi.

Maǵlıwmat ornında, «Jańa Ózbekstan studentleri olimpiadası» sport jarısları joqarı oqıw orınları bakalavriatınıń kúndizgi tálim baǵdarları studentleri arasında sporttıń voleybol, gandbol, basketbol 3×3, stol tennisi, futbol, jeńil atletika hám júziw sıyaqlı túrleri boyınsha 3 basqıshta ótkeriliwi belgilengen.

Bul sport jarısları jaslar arasında salamat báseki ortalıǵın qáliplestiriw menen birge, olardı zıyanlı ádetlerden saqlaw, bos waqtın mazmunlı shólkemlestiriw, sheber hám úmitli sportshılardı anıqlawǵa xızmet etedi.

NMPI baspasóz xızmeti.