Usı jıldıń 12-may kúni Ájiniyaz atındaǵı Nókis mámleketlik pedagogikalıq institutında student-jaslardıń, sonıń ishinde, pitkeriwshi kurs studentleriniń bántligin támiyinlew maqsetinde «Karyera kúni» sheńberinde bos jumıs orınları miynet yarmarkası bolıp ótti.

Miynet yarmarkasına Qaraqalpaqstan Respublikası Mektepke shekemgi hám mektep bilimlendiriwi ministrligi hám oǵan qaraslı qalalıq hám rayonlıq bólimleri wákilleri, Qaraqalpaqstan Respublikası Kámbaǵallıqtı qısqartıw hám bántlik ministrligi, Qaraqalpaqstan Respublikası «Keleshek orayı», kommerciyalıq bankler, sonday-aq, bir qatar joqarı oqıw orınları hám basqa shólkemlerdiń wákilleri qatnastı.

«Karyera kúni» miynet yarmarkasın ótkeriwden gózlengen baslı maqset studentlerge miynet nızamshılıǵı haqqında túsinikler beriw, miynet bazarında sáykes vakanciyalardı izlew kónlikpelerin payda etiw, jumısqa ornalasıw ushın hújjetlerdi tayarlaw hám jumıs beriwshiler menen sáwbetlesiw usılların úyretiw, jumıs beriwshiler ushın institutta tayarlanıp atırǵan kadrlar potencialın tanıstırıw, oqıp atırǵan hám pitkeriwshi kurs studentleriniń bántligin támiyinlewge kómeklesiwden ibarat.

– Ótken oqıw jılında instituttı 4369 student pitkerip shıqqan bolsa, sonnan 81,9 procent pitkeriwshiniń bántligi támiyinlendi. Bıyılǵı oqıw jılında bolsa ulıwma 4420 student pitkerip shıǵıwı kútilip atırǵan bolıp, sonnan házirgi waqıtqa shekem 54 procent pitkeriwshi turaqlı jumıs penen bánt. Búgingi miynet yarmarkası pitkeriwshilerge bos jumıs orınları haqqında maǵlıwmat beriw hám jumısqa ornalasıwına kómeklesiw maqsetinde shólkemlestirilmekte, – deydi instituttıń registrator ofisi baslıǵı Bekmurat Tólepov.

Miynet yarmarkasında tiykarǵı jumıs beriwshiler esaplanǵan Qaraqalpaqstan Respublikası Mektepke shekemgi hám mektep bilimlendiriw ministrligi sistemasındaǵı basqarma hám bólimler menen birgelikte isbilermenlik subyektleri, mámleketlik hám mámleketlik emes mákeme, kárxana hám shólkemlerdiń wákilleri bos jumıs orınları menen qatnastı.

Miynet yarmarkasında student-jaslardıń bántligin támiyinlew, olarǵa tiyisli tarawlar boyınsha jumıs orınlarına jollamalar beriw, jumıs beriwshiler menen shártnamalar dúziw jumısları alıp barıldı.

NMPI baspasóz xızmeti.