Ájiniyaz atındaǵı Nókis mámleketlik pedagogikalıq institutı Tábiyiy pánler fakultetinde «Tábiyiy pánlerdiń aktual máseleleri» atamasındaǵı respublikalıq ilimiy-teoriyalıq konferenciya bolıp ótti.

Bul konferenciya tábiyiy pánler tarawında alıp barılıp atırǵan ilimiy-izertlewlerdiń nátiyjelerin dodalaw, zamanagóy ilimniń tabısları menen óz ara tájiriybe almasıw jáne birge islesiwdi rawajlandırıw maqsetinde ótkerildi.

Ilajǵa respublikamızdaǵı joqarı oqıw orınları hám ilimiy-izertlew oraylarınan professor-oqıtıwshılar, ilimpazlar, izleniwshiler, doktorantlar hám ziyrek studentler qatnastı. Konferenciyanıń ashılıw plenar májilisinde biologiya, ekologiya, ximiya, geografiya, fizika hám tábiyiy pánlerdiń basqa baǵdarlarına baylanıslı áhmiyetli máseleler boyınsha ilimiy bayanatlar tıńlandı.

Sonday-aq, tábiyiy resurslardan aqılǵa uǵras paydalanıw, ekologiyalıq mashqalalardı saplastırıw, zamanagóy innovaciyalıq texnologiyalardı bilimlendiriw procesine engiziw hám jas ilimpazlardıń ilimiy potencialın qollap-quwatlaw máseleleri boyınsha pikir almasıldı.

Konferenciya qatnasıwshıları ilimiy-izertlewlerdiń nátiyjeleri boyınsha ózlerin qızıqtırǵan sorawlarǵa juwaplar aldı.

Ilaj juwmaǵında konferenciyanıń tábiyiy pánlerdiń rawajlanıwı, ilimiy-izertlewlerdi qollap-quwatlaw hám jas ilimpazlardı xoshametlewdegi áhmiyeti ayrıqsha atap ótildi.

Konferenciya belgilengen sekciyalar boyınsha óz jumısın dawam ettirdi.

NMPI baspasóz xızmeti.