Ájiniyaz atındaǵı Nókis mámleketlik pedagogikalıq institutında kúndizgi hám sırtqı tálim baǵdarları pitkeriwshi kurs studentleri ushın juwmaqlawshı mámleketlik attestaciyalıq imtixanları shólkemlestirilmekte. Bul imtixanlar studentlerdiń oqıw procesinde iyelegen teoriyalıq bilimleri, ámeliy kónlikpeleri hám kásiplik kompetenciyaların bahalawǵa xızmet etpekte.

Juwmaqlawshı attestaciya processleri ámeldegi normativlik-huqıqıy hújjetlerdiń talapları tiykarında, ashıq-aydınlıq hám qalıslıq principlerine qatań ámel etken halda ótkerilmekte. Imtixanlarda mámleketlik attestaciyalıq komissiyası aǵzaları tárepinen pitkeriwshilerdiń qánigelik pánleri boyınsha bilim hám kónlikpeleri hár tárepleme sınaqtan ótkerilmekte.

Institut basshıları tárepinen imtixanlardı joqarı dárejede shólkemlestiriw, studentler ushın qolaylı sharayatlar jaratıw hám korrupciyalıq jaǵdaylardıń aldın alıw máselelerine ayrıqsha itibar qaratılmaqta.

Juwmaqlawshı mámleketlik attestaciya imtixanları pitkeriwshilerdiń keleshektegi kásiplik jumısına bekkem tiykar jaratıw, olardıń bilim hám potencialın obyektiv bahalawda úlken áhmiyetke iye. Studentler imtixanlarda belsene qatnasıp, óz bilim hám tayarlıq dárejelerin kórsetpekte.

NMPI baspasóz xızmeti.