Usı jıldıń 5-9-iyun kúnleri Tashkent qalasındaǵı Olimpiya qalashasında joqarı oqıw orınlarınıń student-jasları arasında birinshi márte ótkerilip atırǵan «Jańa Ózbekstan studentleri olimpiadası» sport jarıslarınıń respublikalıq basqıshı bolıp ótti.

Ulıwma 7 sport túri boyınsha ótkerilgen jarıstıń final bellesiwlerinde Ájiniyaz atındaǵı Nókis mámleketlik pedagogikalıq institutınıń aymaqlıq basqıshta jeńimpaz bolǵan student qızlar voleybol komandası, sonday-aq, jeńil atletika hám stol tennisi boyınsha sportshı studentleri de qatnasıp, 1 gúmis hám 3 qola medalın jeńip aldı.

Búgin, 11-iyun kúni Nókis temir jol vokzalında sportshı jaslardı saltanatlı kútip alıw máresimi bolıp ótti.

Ilajǵa Qaraqalpaqstan Respublikası Sport ministri E.Qutıbaev, Ózbekstan Milliy Olimpiya komiteti Qaraqalpaqstan bóliminiń atqarıwshı direktorı Sh.Aytbaev, joqarı oqıw orınlarınıń juwapkerleri, keń jámiyetshilik hám ǵalaba xabar quralları wákilleri qatnastı.

Sózge shıqqanlar bul sport jarıslarınıń áhmiyetin ayrıqsha atap ótip, onda múnásip qatnasqan sportshı studentlerge minnetdarshılıq bildirdi hám aldaǵı oqıwlarında, jarıslarda áwmet tiledi.

NMPI baspasóz xızmeti.