Ájiniyaz atındaǵı Nókis mámleketlik pedagogikalıq institutında pitkeriwshi kurs studentleri tárepinen tayarlanǵan pitkeriw qánigelik jumıslarınıń qorǵaw processleri joqarı dárejede hám belgilengen tártip-talaplar tiykarında shólkemlestirilmekte.

Pedagogika-psixologiya hám dóretiwshilik tálim fakulteti pedagogika tálim baǵdarı studentleriniń qorǵaw processlerinde Mámleketlik attestaciya komissiyasınıń baslıǵı, Joqarı bilimlendiriw, ilim hám innovaciyalar ministrligi janındaǵı Student hám oqıwshılardıń sociallıq belsendiligin arttırıw orayınıń direktorı, pedagogika ilimleriniń doktorı, professor Abdumalik Akramov, komissiya aǵzaları, tájiriybeli professor-oqıtıwshılar hám taraw qánigeleri qatnasıp, studentlerdiń ilimiy izleniwleri, teoriyalıq bilimleri hám ámeliy kónlikpelerin qalıs bahaladı.

Studentler ózleriniń ilimiy jumısları boyınsha prezentaciyalar islep, temalardıń aktuallıǵı, erisilgen nátiyjeler hám ámeliy áhmiyeti haqqında tolıq maǵlıwmat berdi.

Processlerdiń ashıq-aydınlıq principleri tiykarında ótkerilip, akademiyalıq hadallıq normalarına qatań ámel etilip atırǵanı pitkeriwshilerdiń bilim hám potencialın ádil bahalawǵa xızmet etpekte.

Pitkeriw qánigelik jumısları qorǵawlarınıń joqarı dárejede shólkemlestiriliwi institutta bilimlendiriwdiń sapasın arttırıw, básekige shıdamlı hám maman kadrlar tayarlaw baǵdarında ámelge asırılıp atırǵan izbe-iz reformalardıń ámeliy kórinisi bolıp esaplanadı.

NMPI baspasóz xızmeti.