Tashkent qalasındaǵı Olimpiya qalashasında «Sport penen baxıtlı ómirge qaray!» súreni tiykarında «Jańa Ózbekstan hayal-qızlar olimpiadası» sport jarıslarınıń respublikalıq final basqıshı bolıp ótti.

Stol tennisi, shaxmat, shashka hám jeńil atletika boyınsha ótkerilgen jarıslarǵa Qaraqalpaqstan Respublikası, wálayatlar hám Tashkent qalasınan kelgen qatnasıwshılar, ministrlikler hám shólkemlerdiń belsendi hayal-qızları, sportshılar hám keń jámiyetshilik wákilleri qatnastı.

Quwanıshlısı, jeńil atletika boyınsha 200 metr aralıqqa juwırıw jarısında Ájiniyaz atındaǵı Nókis mámleketlik pedagogikalıq institutı Pedagogika-psixologiya hám dóretiwshilik tálim fakulteti dene mádeniyatı tálim baǵdarınıń 2-kurs studenti Aysha Jumambetova 1-orındı iyeledi hám «Jańa Ózbekstan hayal-qızlar olimpiadası» sport jarıslarınıń respublikalıq final basqıshı jeńimpazı boldı.

Sportshını jarısqa treneri A.Jumanov tayarladı.

Maǵlıwmat ornında, jarıs juwmaqları boyınsha ulıwma komandalıq esapta Qaraqalpaqstan Respublikası 1-orındı iyeledi.

NMPI baspasóz xızmeti.