Texnikum pitkeriwshileri ushın 2-kurstan studentlikke sáwbet tiykarında qabıllaw baslandı
Usı jıl 5-iyuldan baslap texnikumlardı tabıslı tamamlaǵan pitkeriwshiler ushın joqarı oqıw orınlarınıń bakalavriat tálim baǵdarlarına sáwbet tiykarında 2-kurstan oqıwǵa qabıllaw procesi baslandı.
Arzalar 25-iyulǵa shekem (sol kúni de) my.edu.uz platforması arqalı onlayn tárizde tapsırıladı. Dizimnen ótiw procesinde abiturientlerden diplomnıń túp nusqası talap etilmeydi – tek ǵana shaxstı tastıyıqlawshı maǵlıwmatlardı kirgiziw jetkilikli bolıp, zárúr maǵlıwmatlar sistema tárepinen avtomatikalıq túrde qáliplestiriledi.
Texnikumdı tabıslı tamamlaǵanlar toparına kimler kiredi?
Bul kategoriyaǵa texnikumdaǵı oqıw dáwirinde oqıw semestrleriniń juwmaǵına bola ózlestiriw bahaları 5 (ayrıqsha) hám 4 (jaqsı) bolǵan, biraq bahalarınıń keminde 50 procenti 5 (ayrıqsha) (medicina baǵdarlarında keminde 85 procenti) bolǵan pitkeriwshiler kiredi.
Kimler studentlikke usınıs etiledi?
Sáwbetlesiw nátiyjelerine bola, JOO komissiyası tárepinen tastıyıqlanǵan juwmaqlawshı bahalaw betinde sáwbetlesiw komissiyası aǵzaları qoyǵan ballardıń ortasha kórsetkishi 67 ball hám onnan joqarı bolsa, abiturient sáwbetten ótken esaplanadı hám tólemli kontrakt tiykarında 2-kurstan studentlikke usınıs etiledi.
Maǵlıwmat ushın, bul tártip joqarı áskeriy, joqarı áskeriylestirilgen bilimlendiriw mákemeleri, Tashkent mámleketlik yuridikalıq universiteti, sonday-aq, Ózbekstanda jumıs alıp barıp atırǵan sırt el hám mámleketlik emes joqarı oqıw orınları hám olardıń filiallarına engizilmeydi.