Búgin, 7-iyul kúninen baslap Ájiniyaz atındaǵı Nókis mámleketlik pedagogikalıq institutında 2026-2027-oqıw jılı ushın qabıllaw procesinde bakalavriattıń ayrıqsha qábilet talap etiletuǵın tálim baǵdarlarında kásiplik (dóretiwshilik) imtixanlar baslandı.

Dene mádeniyatı, muzıkalıq tálim, súwretlew óneri hám injenerlik grafikası tálim baǵdarları boyınsha ótkerilip atırǵan imtixanlardıń belgilengen talaplar tiykarında ádil hám ashıq-aydın ótiwi Qaraqalpaqstan Respublikası Joqarǵı Keńesi deputatları, jámiyetlik shólkemler, siyasiy partiyalar, ǵalaba xabar quralları, sonıń menen birge, tiyisli ministrlik hám shólkemlerden biriktirilgen wákiller tárepinen qadaǵalanbaqta.

Imtixanlardıń barısı internet tarmaǵı arqalı ata-analar hám keń jámiyetshilik wákillerine tikkeley alıp kórsetilmekte.

Abiturientlerdiń bilim hám kónlikpelerin bahalaw ushın Qaraqalpaqstan Respublikası Sport ministrligi, Mádeniyat ministrligi, Ózbekstan Kórkem óner akademiyası Qaraqalpaqstan bólimi, sonday-aq, basqa shólkemlerden tájiriybeli qánigeler biriktirilgen bolıp, olar tárepinen hár bir abiturienttiń tayarlıǵı ádil túrde bahalanıp, toplaǵan balları sol waqıttıń ózinde málim etilmekte.

Maǵlıwmat ornında, bıyılǵı jılı Nókis mámleketlik pedagogikalıq institutında bakalavriattıń dene mádeniyatı, muzıkalıq tálim, súwretlew óneri hám injenerlik grafikası tálim baǵdarları boyınsha 500 den aslam abiturientler kásiplik (dóretiwshilik) imtixanların tapsırıwı kútilmekte.

Institutta kásiplik (dóretiwshilik) imtixanlar usı jıldıń 8-iyul kúnine shekem dawam etedi.

NMPI baspasóz xızmeti.