Ájiniyaz atındaǵı Nókis mámleketlik pedagogikalıq institutında 2025-2026-oqıw jılı juwmaǵı boyınsha studentlerdiń «Sociallıq belsendilik indeksi»n bahalawda kitapqumarlıq mádeniyatı boyınsha test sınaqları https://grant.ndpi.uz/ platforması arqalı usı jıldıń 10-iyul kúni saat 23:59 ǵa shekem ótkeriletuǵınlıǵın málim etemiz.

Bunda talaban belgilengen kriteriya boyınsha usınıs etilgen kitaplar arasınan ózi oqıǵan kitapların (maksimal 12 kitapqa shekem) saylaydı hám sol saylaǵan kitapları arasınan dúzilgen test sorawlarına (hár bir test sorawı ushın bir minuttan – jámi 60 minut waqıt belgilengen) juwap beredi. Test juwmaǵında ulıwma toplanǵan ball esabın tastıyıqlawshı fayldı júklep aladı hám student tárepinen jıl dawamında oqıǵan kitaplar sanı degen bólimge (oqıǵan kitaplar sanına qaray) júkleydi.

Sonday-aq, tolıq hám tolıq bolmaǵan tálim grantına talabanlar «Sociallıq belsendilik indeksi»n bahalawda qarar boyınsha belgilengen indikatorlar ushın tastıyıqlanǵan maǵlıwmatların, jetiskenlikleri boyınsha tiykarlawshı hújjetlerin, «Bes baslama» sheńberinde shólkemlestirilgen dógereklerge qatnasqanı yamasa basshılıq etkenligi, sport hám ruwxıy-aǵartıwshılıq ilajlarına qatnasqanlıǵın tastıyıqlawshı hújjetlerdi 2026-jıl 10-iyul kúni saat 23:59 ǵa shekem https://my.hemis.uz platformasına júklewi tiyis. Hár bir júklengen maǵlıwmatlar tyutorlar jáne belgilengen juwapkerler tárepinen úyrenip shıǵıladı hám tastıyıqlanadı.