Ájiniyaz atındaǵı Nókis mámleketlik pedagogikalıq institutı 2026-2027-oqıw jılında oqıwın kóshiriw (kóshirip tiklew) hám qayta tiklew niyetinde bolǵan institut studentleri ushın arzalar 2026-jıl 15-iyuldan 5-avgustqa shekem (sol kúni de) qabıl etiletuǵınlıǵın málim etedi.

Joqarı oqıw orınlarına studentlerdiń oqıwın kóshiriw (kóshirip tiklew) hám qayta tiklew boyınsha arzalardı dizimnen ótkeriw Joqarı bilimlendiriw, ilim hám innovaciyalar ministrliginiń – transfer.edu.uz yamasa Birden-bir interaktiv mámleketlik xızmetler portalı – my.gov.uz arqalı 2026-jıl 15-iyuldan 5-avgustqa shekem (5-avgust kúni de) elektron platforma arqalı ámelge asırıladı.

Respublikanıń bir mámleketlik joqarı oqıw ornınan basqa joqarı oqıw ornına oqıwın kóshiriwge barlıq studentler de hújjet tapsıra almaydı. Tek ǵana 2 keshirimli sebebi bar studentlerge ruxsat beriledi.

1️⃣Student shańaraq qurıwı múnásibeti menen ómirlik joldası turaqlı jasaytuǵın aymaqtaǵı JOOǵa oqıwın kóshiriw ushın;
2️⃣Mámleketlik uyımlardıń xızmetkerleri jumıs ornı ózgergen jaǵdayda onıń ómirlik joldası yamasa erjetpegen perzentiniń oqıwın kóshiriw ushın (tiyisli ministrlik (mákeme) basshısınıń usınısı tiykarında).

Sırt el hám mámleketlik emes joqarı oqıw orınlarınan mámleketlik joqarı oqıw orınlarınıń sáykes hám túrles bakalavriat tálim baǵdarlarına – «my.uzbmb.uz» platforması arqalı jiberiledi.

Jańa tártipke bola, sırt el hám mámleketlik emes JOOlardan mámleketlik JOOlarǵa oqıwın kóshiriwde:

➖ulıwma bilim beriw pánleri hám shet tili boyınsha milliy sertifikatlar málimleme sisteması arqalı avtomatikalıq túrde anıqlanadı;
➖xalıqaralıq sertifikatlar bolsa talaban tárepinen basqa hújjetler menen birge elektron tárizde júklenedi.

Esletip ótemiz, Ministrler Kabinetiniń 2026-jıl 11-iyundaǵı 299-sanlı qararına muwapıq, sırt el hám mámleketlik emes joqarı oqıw orınlarınan mámleketlik JOOlardıń sáykes hám túrles bakalavriat tálim baǵdarlarına oqıwın kóshiriwde shet tili jáne ulıwma bilim beriw pánleri boyınsha milliy yamasa xalıqaralıq sertifikatqa iye talabanlarǵa tiyisli pánlerden differenciallastırılǵan yamasa maksimal ball beriledi.

Oqıwın kóshiriw hám qayta tiklew niyetin bildirgen studentler elektron platformaǵa óziniń jeke identifikaciyalıq maǵlıwmatların kirgizedi hám ózine tiyisli tómendegi hújjetlerdi júkleydi:

1️⃣Akademiyalıq maǵlıwmatnama yamasa transkript nusqası;
2️⃣Mámleketlik uyımlar xızmetkerleriniń jumıs ornı ózgergen jaǵdayda onıń ómirlik joldası yamasa erjetpegen perzentiniń oqıwın kóshiriw ushın tiyisli ministrlik (mákeme) basshısınıń usınısı;
3️⃣Turmıs qurǵanlıǵı haqqındaǵı gúwalıq.

Studentlerdiń múrájatları instituttıń bas imaratındaǵı 115-xanada qabıl etiledi.

☎️Maǵlıwmat ushın telefonlar:

+998612294065

+998612294074