Ájiniyaz atındaǵı Nókis mámleketlik pedagogikalıq institutında jaslardıń jazǵı demalıs dáwirin mazmunlı shólkemlestiriw, olardıń bos waqtın nátiyjeli ótkeriw hám salamat turmıs tárizin keń úgit-násiyatlaw maqsetinde «Áhmiyetli 90 kún» sheńberinde sport dógerekleriniń jumısları jolǵa qoyıldı.

Qaraqalpaqstan Respublikası Sport ministrligi menen birgelikte shólkemlestirilgen sport dógereklerine studentler menen bir qatarda institut átirapındaǵı máhállelerde jasaytuǵın jaslar hám mektep jasındaǵı balalar da qatnaspaqta.

Dógerek jumısları tájiriybeli trenerler basshılıǵında shólkemlestirilgen bolıp, qatnasıwshılardıń fizikalıq salamatlıǵın bekkemlew, sportqa bolǵan qızıǵıwshılıǵın arttırıw hám bos waqtın mazmunlı ótkeriwge xızmet etpekte.

Sport dógerekleri dawamında institut rektoratı, sport klubı hám Jaslar awqamı baslanǵısh shólkemi tárepinen jarıslar turaqlı túrde ótkerilmekte. Usı jarıslarda qatnasıwshılar óz sheberliklerin arttırıw, komandada islew kónlikpelerin rawajlandırıw hám salamat ortalıqta belsene qatnasıw imkaniyatına iye bolmaqta.

Institutta «Áhmiyetli 90 kún» sheńberinde jaslardıń intellektual, ruwxıy hám fizikalıq rawajlanıwın qollap-quwatlawǵa baǵdarlanǵan bunday ilajlar jaz máwsimi dawamında turaqlı dawam etedi.

NMPI baspasóz xızmeti.