Kafedra baslıǵı:	Ótepbergenov Jetkerbay Sakbergenovich
	Tel.:	+99897 220 7204
	Qabıllaw waqtı	Dúyshembi-Shembi Saat 10-00 den 16-00 ge shekem

     Kafedrada 15 shtat birligi bolıp, onı 2023-jıl noyabr ayınan baslap p.i.f.d (PhD), docent J.Ótepbergenov basqarıp barmaqta. Házirgi waqıtta kafedrada e.i.k, docent A.Abdullaev, f.-m.i.k., docent M.Eshanov, p.i.d (DcS), docent M.Allambergenova, p.i.f.d (PhD), docent Z.Ilyasova, f.-m.i.k., doc.w.w.a M.Alaminov, p.i.f.d (PhD) A.Qunnazarov, úlken oqıtıwshılar J.Júginisova, U.Asanova, D.Turdishov,  assistent oqıtıwshılar L.Saxanova, M.Avezov, Yu.Aytımbetov, A.Keńesbaev, stajer oqıtıwshılar A.Utepbergenova, B.Zarımbetova hám pán kabinet meńgeriwshisi D.Saxanovalar xızmet etip kelmekte. Kafedra oqıtıwshısı A.Qunnazarov 2024-jılı óz ilimiy jumısların qorǵap shıqtı. Házirgi waqıtta kafedranıń ilimiy potencialı 41,1%  ke jetti. Kafedrada házirgi waqıtta 15 shtat birligi bolıp 1 ilim doktorı(DcS), 3 ilim kandidatı, 3 pedagogika ilimler boyınsha filasofiya doctorı (PhD), 2 úlken oqıtıwshı,  4 assistent , 2 stajer oqıtıwshı hám sonnan 1 ilim doktorı(DcS), 1 úlken oqıtıwshı,  2 assistent oqıtıwshı muddetli shartnama tiykarında jumıs alıp barmaqta. Kafedramızǵa tiyisli bolǵan 60110600-Matematika hám informatika bakalavr tálim baǵdarı, 70610105-Tálimde xabar texnologiyalari magistratura qánigeligi, sonday-aq  2024-2025 oqıw jılında 60540200-Ámeliy matematika bakalavr tálim baǵdarı ashılıp talabalar bilim almaqta.

Kafedrada 16800 kóleminde saatlar oqıtıwshılarǵa tolıq bólistirilgen. Kafedraǵa tiyisli 2 kompyuter xanası bar.

Kafedra tariyxı

     Watanımızdıń ǵáresizlikke erisiwi xalıq tálimi sistemasına hám tálim-tárbiya processine zamanagóy xabar texnologiyaların engiziwdi, tálimdi kompyuterlestiriw mashqalaların úlken wazıypa etip qoydı. Sonıń ushın Ájiniyaz atındaǵı Nókis mámleketlik pedagogikalıq institutınıń ilimiy Keńesiniń qararı menen 1996-jılı 13-dekabrde «Matematika-informatika» fakultetiniń bazasında «Informatika hám esaplaw texnikası» kafedrası ashıldı hám oǵan kafedra baslıǵı bolıp ekonomika ilimleriniń kandidatı, docent Alisher Abdullaev tayınlanıp basqarıp bardı.

     Kafedrada eki docent (A.Abdullaev, B.Axmetov), 3 aǵa oqıtıwshı (M.Bekimbetov, M.Seytimbetov, K.Shamuratov) hám 5 assistent isledi. «Informatika hám esaplaw texnikası» kafedrasına tómendegi áhimiyetli wazıypalar júklendi: tálim salasın kompyuterlestiriw, oǵan xabar texnologiyaların engiziwge baylanıslı mashqalalardı sheshiw; ulıwma orta tálimde kompyuterli tálim metodologiyasın jaratıw, pedagogikalıq dástúrıy quralların (PDQ) jaratıwdıń teoriyalıq hám ámeliy metodologiyasın islep shıǵıw; oqıw materiallarına PDQ ǵa sáykeslendirip islep shıǵıw; maǵlıwmatlar bazasın oqıtıw processinde jaratıw, olardan paydalanıw sistemasın ilimiy tiykarlaw, sabaq processindegi basqıshlardı tolıq kompyuterlestiriw máselesin kompleks úyreniw.

     Ózbekstan Respublikasınıń «Kadrlar tayarlaw Milliy dástúrin» de belgilep berilgen kadrlar tayarlaw tizimin rawajlandırıwdıń tiykarǵı jónelisleri «Ilim menen tálim processi baylanısların rawajlandırıw» bándi mazmunına, húkimetimiz tárepinen qabıl etilgen «Internet» tiń xalıq aralıq xabar sistemalarına keń kirip barıwın támiyinlew dástúrin islep shıǵıw shara tádbirleri haqqındaǵı, «2002-2010 jıllarda kompyuterlestiriw hám xabar-kommunikaciya texnologiyaların rawajlandırıw dástúri haqqında»ǵı Qararları hámde «Kompyuterlestiriwdi jánede rawajlandırıw hám xabar-kommunikaciya texnologiyaların engiziw haqqında»ǵı, «2004-2009 jıllarda mektep tálimin rawajlandırıw Mámleketlik ulıwma milliy dástúri haqqında»ǵı prezident Pármanlarında belgilengen wazıypalarǵa hám joqarıda kórsetilgen talaplarǵa sáykes Informatika hám esaplaw texnikası kafedrası atamasın 2001-jıl 25-may kúngi pedagogikalq institut Ilimiy Keńesi qararı menen Informatika hám xabar texnologiyaları kafedrası atamasına ózgertildi.          Informatika hám xabar texnologiyaları kafedrasında bes ilim kandidatı (docentler A.Abdullaev, S.Pirnazarov, J.Allanazarov, ilim kandidatları M.Alaminov, A.Tureniyazova) eki úlken oqıtıwshı (M.Bekimbetov, M.Seytimbetov),  bes assistent (M.Allambergenova, J.Juginisova, B.Kallieva, U.Asanova, Z.Ilyasova, I.Qunnazarov, O.Nurlıbaev, X.Atajanov), isledi. Kafedranıń ilimiy kadrlar menen támiyinleniw dárejesi 38,5% boldı.  Ózbekistan Respublikasınıń ilimiy-texnikalıq rawajlanıwınıń prioritet baǵdarlarına sáykes “Informatika hám xabar texnologiyaları” kafedrasınıń 2004-2010 jıllarǵa jobalastırılǵan ilimiy baǵdarı Informatika hám telekommunikaciyalıq texnologiyalardıń rawajlanıwın keńnen támiynlew maqsetinde, házirgi zaman informaciyalıq sistemalardı, basqarıw quralların, maǵlıwmatlar bazasın hám programmalıq ónimlerdi islep shıǵıw. Sonday-aq, Zamanagóy xabar texnolgiyaları bazasında oqıtıwdıń avtomatlastırılǵan sistemaların islep shıǵıw mashqalaları atamasındaǵı ilimiy temada jumıs alıp bardı.

     Kafedrada házirge shekem 83 metodikalıq jumıs, ilimiy maqalalar, tezisler baspadan shıqqan bolıp olardıń ulıwma kólemi 73,3 baspa tabaqtı quraydı. Informatika hám xabar texnologiyaları kafedrasınıń aǵzaları járiyalanǵan ilimiy-izertlew jumısları boyınsha pedagogikalıq institut kóleminde dıqqatqa ılayıq  jetiskenliklerge eristi:

1. 2001-2002 oqıw jılında 4-kurs studenti Qalekeeva T., 2-kurs studentleri N.Sultanova hám M.Nurımbetovalar Ózbekistan Respublikası studentleri olimpiadasınıń 2-basqıshında Informatika páninen komanda quramında qatnasıp Ózbekistan Respublikasındaǵı pedagogikalıq institutları arasında birinshi orındı iyeledi (2002-jıl 3-may). Docent A.Abdullaevtıń basshılıǵında matematika-informatika fakultetiniń 4-kurs studenti T.Qalekeeva Samarqand qalasında ótkerilgen “Kompyuter sawatqanlıǵı” boyınsha islep shıǵılǵan programmalıq ónimler kórik tańlawında birinshi orındı iyeledi. Student T.Kalekeeva Ózbekistan Respublikası xalıq tálim ministrliginiń ekinshi dárejeli diplomı menen sıylıqlandı(2002-j 26-aprel).
2. Kafedra professor oqıtıwshıları Ózbekistan Respublikası Resurs Orayınıń Qaraqalpaqstan bóliminde (2003-jıl 26-28-aprel) ótkerilgen «Oqıtıw processinde aralıqtan oqıtıwdı engiziw mashqalaları» seminarınıń sertifikatın, Tashkent ijtimoiy ma’rifat markazi (2001-jıl 13-17 iyun) fuqorashunosilik seminarınıń sertifikatın, IREX fondınıń sertifikatın jeńip aldı, kafedranıń aǵa oqıtıwshısı Seytimbetov Mámbetyar elektron esaplaw mashinaları ushın jaratılǵan programmaǵa Ózbekstan Respublikasınıń mámleketlik patentiniń №DGU 00604 guwalıǵın (2003-jıl 14-yanvar) alıwǵa eristi.
3. Kafedrada shártnama tiykarında byudjetten tısqarı qárjı tabıw “Kompyuter ilimin úyreniw tiykarları” tólemli kurs esabınan ámelge asırıldı. Jámi 2000-2003-jılları kurs esabınan 1.5 mln. summnan aslam pedagogikalıq institut esabına ótkerildi.
4. 2003-jılda “Informatika hám xabar texnologiyaları” kafedrasınıń baslıǵı docent A.Abdullaev Ózbekistan Respublikasınıń Ilim hám texnolgiya orayı járiyalaǵan grant konkursına qatnasıp “Razrabotka nauchnıx osnov social’no-ekologicheskoy situacii Respubliki Karakalpakstan”(GNTP-20.54) teması boyınsha 6705000 sum kóleminde mámleketlik grant jeńip aldı.
5. Kafedranıń professor-oqıtıwshıları 2005-2009 jıllar dawamında Nizamiy atındaǵı Tashkent mámleketlik pedagogikalıq universitetinde, Ózbekistan milliy universitetinde, Tashkent informaciyalıq texnologiyaları universitetinde, Jáhan diplomatiya universitetinde, Tashkent informaciyalıq texnologiyaları universitetiniń Nókis filialında, Qaraqalpaq mámleketlik universitetinde zamanagóy informaciyalıq hám pedagogikalıq texnologiyalardı oqıtıw processinde paydalanıw boyınsha bilimlerin jetilistirip hám qánigeligin jetilistirdi.  Sonday-aq, kolledj hám liceyler menen óz-ara birge islesiw shártnamaları dúzilip olar menen birge bir qansha jumıslar alıp barıldı.
6. Kafedra aǵzaları Xalıq aralıq hám Respublikalıq konferenciyalarǵa aktiv túrde qatnasıp bardı.
7. Kafedranıń assistent oqıtıwshısı Uldáwlet Asanova 1995-jılı injener-pedagogika fakultetiniń talabası bolıp Uluǵbek atındaǵı stipendiya alıwǵa miyasar boldı.

     Kafedrada ziyrek talabalar menen islesiwge úlken itibar berilgen. Olar ushın “Jas informatik” dógeregi shólkemlestirilip, onda tájiriybeli professor-oqıtıwshılarımız algoritmlestiriw hám programmalastırıw sırların jaslarǵa úyretip bardı. Nátiyjede 2003-jıl IV-kurs talabaları A.Aqtilevov “Kamolot” jaslar háreketiniń stipendiyasına, B.Tlegenov Beruniy atındaǵı stipendiyasın alıwǵa miyassar boldı.

     Kafedranıń professor-oqıtıwshıları tárepinen licey hám kolledj talabaları ushın arnalǵan A.Sattarovtıń Informatika hám xabar texnologiyaları. («Bilim»,  N., 2005j.) sabaqlıǵın,  A.Abdukodirovtıń Xabar texnologiyaları. («Bilim»,  N., 2005j.) sabaqlıǵın ózbek tilinen qaraqalpaq tiline awdarma jasadı.

Kafedranıń aǵa oqıtıwshısı M.Seytimbetov 2005-jılı oktyabr ayında kandidatlıq dissertaciya jumısın qorǵadı. M.Seytimbetov 2007-jıl  dekabr ayında kafedra baslıǵı lawazımına saylandı.

     Kafedra aǵzaları oqıw, ilimiy-izertlew jumısları menen birgelikte  ruwxıy-aǵartıwshılıq hám tárbiya jumısların da alıp baradı.

     Kafedra professor-oqıtıwshılarınıń baslaması menen 2008-jılı mart ayında talabalar arasında “Ájayıp informatika” atamasında pán konkursı ótkizildi. Onda matematika-informatika bakalavr baǵdarınıń talabaları qatnastı. Bul konkursta 1 kurs talabaları sıylıqlı birinshi orındı iyeledi. 1, 2 hám 3 orınlarǵa hám belsendi qatnasıwshılarǵa institut Kamolot jaslar háreketi, fakultet hám kafedramız tárepinen sıylıqlar hám húrmet jarlıqları tapsırıldı. Kafedra professor-oqıtıwshıları talabalar toparlarına basshılıq etedi. Olar diniy ekstremizm hám terrorizmge qarsı gúres boyınsha talabalar ortasında sáwbetler ótkizip baradı.

     2005-2006 oqıw jılında 5A140102 – Informatika qánigeligi boyınsha magistratura ashıldı. Magitraturada oqıtılatuǵın pánlerdi kafedranıń ilimiy dárejege iye professor-oqıtıwshıları oqıtıp bardı.  

     Talabalar menen birgelikte ilimiy jumıslar da alıp barıldı. Kafedranıń professor-oqıtıwshıları 2005-2009 jıllar ishinde talabalar menen birgelikte respublikalıq, xalıq-aralıq, joqarǵı oqıw orınları hám ministrlikler tárepinen shólkemlestirilgen konferenciyalarda ilimiy bayanatları menen qatnasıp bardı.

     Talabalardıń óz betinshe bilim alıwın shólkemlestiriw máqsetinde oqıtılıp atırǵan barlıq pánler boyınsha  lekciyalar toplamı, test sorawları, óz betinshe úyreniw ushın tapsırmalar, paydalanılatuǵın ádebiyatlar kafedranıń virtual maǵlıwmatlar bazasına jaylastırıldı. Kafedra janındaǵı eki kompyuter klass Internet tarmaǵına jalǵanǵan bolıp, bul talabalardıń óz betinshe islewine hám alternativ resurs oraylarınan bilim alıwǵa járdem beredi.

Kafedrada ilimiy pedagogikalıq kadrlardı tayarlawǵa úlken áhmiyet berilgen.

     2009-2010 oqıw jılında kafedranıń úsh assistent oqıtıwshısı Nizamiy atındaǵı Tashkent mámleketlik pedagogikalıq universitetinde, Ózbekistan Ilimler akademiyasınıń matematika hám informaciyalıq texnologiyalar ilimiy-izertlew institutında hám Rossiya mámleketiniń Voronej qalasındaǵı  joqarǵı oqıw ornında aspiranturada oqıdı.

     “Informatika hám xabar texnologiyaları” kafedrası qánigelestirilgen kafedra bolıp mektepler, kolledjler hám akademiyalıq liceyler ushın 5140100-bakalavr tálim baǵdarı hám 5A140102-Informatika magisratura qánigeligi boyınsha oqıtıwshı-pedagog kadrlar tayarlaydı hám pitkeriwshilerdi jumıs ornı menen támiyinlewge járdem beredi.   

     2010-2016 jılları «Informatika oqıtıw metodikasi» kafedrasın fízíka-matematika pánleri kandidati A. Tureniyazova basqardı. Bul dáwirde kafedra professor-oqıtıwshıları tárepinen tómendegi jumıslar ámelge asırıldı. 2012-jıldıń 1 martında M.X.Allambergenova “Informatikadan interaktiv oqıw kompleksler jaratıw hám olardan tálim processinde paydalanıw” temasında kandidatlıq dissertatsiya jumısın tabıslı qorǵadı. 2016-jıl ushın «Eń jaqsı pedagog-izertlewshi» Respublika basqıshınıń Pedagogika bilimlendiriw tarawı boyınsha  nominaciyası jeńimpazı boldı.

     Kafedra baslıǵı Asiya Tureniyazovanıń institutqa shet el investiciyaların alıp keliw háreketleri nátiyjesinde 2016-2019 jıllarda Evropa Awqamı Erasmus+ programması tárepinen 2 joybar:

     – RUECVET 574097-EPP-1-2016-1-CY-EPPKA2-CBHE-JP “RUECVET: Piloting ECVET to the national VET system of Russia and Uzbekistan” (Evropanıӊ kásiplik tálim ushın kredit sistemasın (ECVET) Rossiya hám Ózbekstan milliy bilimlendiriw sistemalarında sınaqtan ótkeriw)

     – 574253-EPP-1-2016-1-DE-EPPKA2-CBHE-JP MAGNET: University as a key partner of NETwork for vocational educational training centers of Middle Age Generation in Uzbekistan (Universitetler Ózbekistanda orta jas puxaralardı oqıtıw hám kásipke tayarlaw oraylarınıń tiykarǵı partnyorı) qarjılandırıldı. Usı joybarlar sheńberinde institut xızmetkerleri Evropa universitetlerinde qánigeligin arttırdı, oqıw laboratoriyaları 100 mıń evrolıq zamanagóy ásbap-úskeneler menen támiyinlendi.

     2010-2013 jıllar dawamında kafedra professor-oqıtıwshıları tárepinen 2 oqıw qollanba, 27 metodikalıq qóllanba, 62 tezis, 5 tezisler milliy baspalarda, 53 ilimiy maqalalar, sonıń menen birge, 35 JAK tárepinen tastıyıqlanǵan jurnallarda, 8 maqala xalıq aralıq kólemde, 1 shet elde hám 1 monografiya baspada járiyalandı.

     2017-2023 jıllarda «Informatika oqıtıw metodikasi» kafedrasın fízíka-matematika ilimleri kandidati M. Alaminov basqardı. Kafedra oqıtıwshılarınan 2018-jılı P.Kalxanov, 2020-jılı J.Ótepbergenov, 2021-jılı Z.Ilyasova, 2022-jılı J.Pirekeev, 2023-jılı M.Mambetniyazov, O.Zaripov, B.Tlegenovlar óz ilimiy jumısların tabıslı qorǵap diplomların alıp, ilimiy dárejege iye boldı.

     2018-jılı kafedra oqıtıwshıları M.Alaminov hám T.Utemuratovlar avtorlıǵında “Kompyuter tarmaqları”, Z.Ilyasova hám U.Asanovalardıń avtorlıǵında “Informatika”, 2019-jılı M. Alaminov, J. Juginisova, L. Saxanova, J. Ótepbergenov, B.Tlegenovlar avtorlıǵında “Maǵlıwmatlar bazası”, 2020-jılı U.Asanova, A.Jumamuratov hám Y.Aytımbetovlar avtorlıǵında  “Kompyuter támiynleniwi” oqıw–qóllanbaları, 2021-jılı Z.Ilyasovanıń avtorlıǵında  “Informatikanıń teoriyalıq tiykarları” atamasındaǵı sabaqlıǵı qaraqalpaq latın imlasında baspada járiyalandı. Bunnan basqada bir neshe  sabaqlıq hám oqıw qollanbalar Joqarı hám orta arnawlı bilimlendiriw Ministirligi qasındaǵı muwapıqlastırıwshı keńesten tabıslı ótip, tiyisli sertifikatları alınıp baspaǵa usınıs etildi.