Ájiniyaz atındaǵı Nókis mámleketlik pedagogikalıq institutınıń ǵalaba xabar qurallarınıń biri bolǵan «Ilim hám jámiyet» ilimiy-metodikalıq jurnalınıń juwaplı xatkeri D.Dogarova Ózbekstan Respublikası Oliy Majlis janındaǵı mámleketlik emes, kommerciyalıq emes shólkemlerdi hám puqaralıq jámiyetiniń basqada institutların qollap-quwatlawshı jámátlik fond tárepinen járiyalanǵan 3-4 grantlar tańlawına «Háreketler strategiyasın jaslarımız biliwi kerek!» atamasındaǵı joybarı menen qatnasıp jeńiske erisken edi. Joybardı orınlaw múddeti 10 ay bolıp, oǵan 24 million sum ajıratılǵan. Bul joybardıń maqseti – Keleshegimiz bolǵan jaslardı ruwxıy jaqtan ádep-ikramlı hám barkamal áwlad etip tárbiyalaw islerinde, olardıń ómirde múnásip orın iyelewine keń imkaniyatlar jaratıw, huqıqıy bilimin hám huqıqıy mádeniyatın rawajlandırıwdan ibarat.
Mámleketimiz basshısı tárepinen 2017-jıl 8-fevralda qabıl etilgen 2017-2021-jıllarda Ózbekstan Respublikasın rawajlandırıwdıń bes áhmiyetli baǵdarı boyınsha Háreketler strategiyasında mámleketimizdiń búgingi rawajlanıw jolı, keleshektegi maqsetleri keń túrde ashıp berilgen.
Háreketler strategiyası sheńberinde qabıl etilgen Nızam hám Nızamshılıǵımızdaǵı jańalıqlar, ózgerisler, olardıń mazmunı hám áhmiyetin institut jaslarına hám Qaraqalpaqstan Respublikasınıń shetki aymaqlarındaǵı (rayonlardaǵı) jaslarǵa jetkiziwde bul joybardıń áhmiyeti úlken. Joybar tiykarında «Milliy ideya ruwxıylıq tiykarları hám huqıq tálimi» kafedrasınıń professor oqıtıwshıları instituttıń bárshe fakultetlerinde 60 tan aslam qosımsha sabaqlardı jańa interaktiv metodlar tiykarında ótti. Háreketler strategiyası hám onıń áhmiyetli bes baǵdarın úyrenip atırǵan studentler ushın joybar tiykarında shólkemlestirilgen strateg.ndpi.uz saytında test sorawları shólkemlestirilip, studentlerdiń alǵan bilimleri tekserilip barıldı. Sonday-aq, studentler ushın joybar sheńberinde «Bilim ring» intellektual oyını, «Siz nızamdı bilesiz be?» kórik tańlawı, «Qıl qálem iyeleriniń párwazı» atamasındaǵı súwretlew tańlawları ótkizildi. Bul da óz gezeginde studentlerdiń bilimin tereńlestiriwge tiykar boldı. Nátiyjede jaslardıń huqıqıy sawatlılıǵı keńeyip, Hareketler strategiyası haqqındaǵı bilimleri qosımsha sabaqlar, interaktiv oyınlar, seminar-treningler arqalı arttırıp barıldı.
Bul ótkerilgen qosımsha sabaqlar hám tańlawlar, oyınlar, soraw-juwaplar hám taǵı basqa interaktiv metodlar arqalı studentlerge úgit-násiyatlawshı toparınıń bergen bilimleri tiykarında mámleketimizde ámelge asırılıp atırǵan reformalardıń qánshelli dárejede xalıq mápi ushın xızmet etip atırǵanlıǵın bilip aldı.
Háreketler strategiyası sheńberinde shıǵarılıp atırǵan Nızamlar hám oǵan kirgizilgen ózgerisler, olardıń mazmunı hám áhmiyetin ózinde ashıp beretuǵın qánigelerdiń, studentlerdiń maqalalarınan ibarat 100 dana maqalalar toplamı shıǵarıldı, Bul kitaplar respublikalıq kólemdegi joqarı oqıw orınlarınıń málimleme-resurs oraylarına biypul jetkerip berildi.
Joybarǵa qatnasqan «Tarǵibotchilar» toparı tek institut kólemindegi student jaslar menen sheklenip qalmastan, Qaraqalpaqstan Respublikasınıń shetki rayonları – Ámiwdárya, Qanlıkól hám Qaraózek rayonınıń jasları menen ushırasıp, Háreketler strategiyası haqqında keńirek túsinikler berdi. On ay dawam etken bul joybar juwmaqlanıp, joybarǵa qatnasqan professor-oqıtıwshılar joybar baslıǵı D.Dogarova hám instituttıń ilimiy isleri hám innovaciyalar boyınsha prorektorı P.Qalqanovlar tárepinen diplom, qımbat bahalı sawǵalar menen sıylıqladı.