ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Institut hayal-qızlar keńesi baslanǵısh shólkeminiń esap beriw hám saylaw jıynalısı bolıp ótti

20-sentyabr kúni Ájiniyaz atındaǵı Nókis mámleketlik pedagogikalıq institutında hayal-qızlar keńesi baslanǵısh shólkemi tárepinen 2013-2018-jıllarda islengen jumıslardıń juwmaǵına baǵıshlanǵan esap beriw hám saylaw jıynalısı bolıp ótti. Jıynalıstı instituttıń jaslar menen islesiw máseleleri boyınsha prorektorı Q.Qadirov ashıp berdi. Ilajǵa Nókis qalası hákiminiń orınbasarı, qalalıq hayal-qızlar komiteti baslıǵı G.Abibullaeva hám instituttıń hayal-qızlardan ibarat professor-oqıtıwshıları, student qızlar qatnastı. Kún tártibindegi tiykarǵı másele boyınsha institut hayal-qızlar keńesi baslanǵısh shólkemi baslıǵı B.Arzieva baslanǵısh shólkem tárepinen ótken 5 jıllıq dáwir ishinde alıp barılǵan jumıslar, qolǵa kirgizilgen tabıslar hám aldaǵı jobalastırılǵan ilajlar haqqında bayanat jasadı. Házirgi waqıtta baslanǵısh shólkemge jámi 4520 hayal-qız aǵza bolıp, sonnan 237 professor-oqıtıwshı, 165 texnikalıq xızmetker, 4060 bakalavr hám 58 magistratura baǵdarınıń studentleri bolıp tabıladı. Hayal-qızlardan ibarat professor-oqıtıwshılardan 1 ilim doktorı, 56 ilim kandidatı, 46 úlken oqıtıwshı, 134 assistent-oqıtıwshı studentlerge tálim-tárbiya berip kelmekte. Institutta oqıp atırǵan student qızlar arasında hár jılı «Azada qızlar», «Institut gózzalları», «Ilimpaz qızlar», «Institut arıwı» tańlawları turaqlı túrde ótkerip kelinbekte. Student qızlar arasında salamat turmıs tárizin en jaydırıw maqsetinde sporttıń voleybol, basketbol túrlerinen fakultetler arasında birinshilikler, sonday-aq, erte turmıs qurıwdıń aldın alıw hám basqa máseleler boyınsha turaqlı túrde ilajlar shólkemlestirilip barılmaqta. Qızlardıń bos waqıtların nátiyjeli shólkemlestiriw maqsetinde «Tumaris» xalıq ansamblinde milliy ayaq-oyınlar jáne sheber qollar dógerekleri islep tur. Institut student qızları jaratılǵan sharayatlardan nátiyjeli paydalanıp, úlken tabıslardı qolǵa kirgizbekte. Atap aytqanda, usı jıldıń mart ayında instituttıń dene mádeniyatı fakulteti studenti SHahodat Jollıbaeva Zulfiya atındaǵı mámleketlik sıylıqtıń laureatı boldı. Sporttıń voleybol túri boyınsha instituttıń qızlar komandası 10-13-sentyabr kúnleri Tashkent qalasında ótkerilgen Ózbekstan superkubogı jeńimpazı bolıp, absolyut chempionlıǵın qolǵa kirgizdi. Sonday-aq, usı jıldıń 6-11-sentyabr kúnleri Qashqadárya wálayatınıń SHahrisabz qalasında birinshi márte ótkerilgen «Maqom-2018» xalıqaralıq festivalında instituttıń student qızları milliy kiyimlerde xalqımız qızlarınıń qol óneri úlgilerin kórsetip, milliy saz ásbaplarda milliy qosıqlarımızdı atqarıp shıqtı. Jıynalısta hayal-qızlar keńesi baslanǵısh shólkeminiń jumısları jaqsı alıp barılǵanlıǵı ayrıqsha atap ótildi hám B.Arzievanıń kandidaturası jáne bir márte usınılıp, barlıq qatnasıwshılar tárepinen maqullandı. Ilajda oqıwda hám jámiyetlik jumıslarda belsendilik kórsetip kiyatırǵan institut hayal-qızları húrmet jarlıqları hám estelik sawǵaları menen sıylıqlandı. Jıynalıs institut student qızlarınıń milliy ónermentshilik, súwretlew óneri hám sport tarawındaǵı jetiskenlikleriniń kórgizbesi menen dawam etti. Islam Matekov, NMPI baspasóz xatkeri.