Murınģa kóp enip sháhár samalı,
Shayır bolıp ketippen be shamalı?
“Kontraktta oqıtıp atpan balanı”
-Dep bir júrisleriń unaydı Ana.

Awıl-Nókis bir adım-aw arası,
Qatnap tur avtobus taģı Daması,
Qaytpadım awılģa bir ay shaması,
Ózińsiz ótkerdim bir aydı Ana.

Ańsat emes oqıw, qalada jasaw,
Bunda waqıt atı oģada asaw,
“Pul joq” ázelden studentke sıltaw,
Sıltaw da shınlıqqa usaydı Ana.

Sulıw hamyan berdi qızlar bayramda,
Eplep pul salıp turmiz anda-sanda,
Sen “sút haqı” demeyseń, biraq jolda
Balańnan jol haqı soraydı Ana.

Qolıń nanday aziz bolģan nan jawa,
Adam Atasız qalģan Eneseń Hawa,
“Saģındım,-deyseń,-Sen she balam?-Awa…
Balań saģınıwģa turmaydı Ana.

 

Allayar DARMENOV,

NMPI Filologiya fakulteti studenti
30.01.2018 jıl

(Anańızdı ardaqlańız, qádirdanım)