Жоқары билимлендириў системасында халық хожалығының түрли тараўлары ушын маман кадрлар таярлаў, бул мақсетлерге ерисиў жолында сырт еллердеги, соның менен бирге, елимиздеги илимий-педагогикалық потенциалы жоқары болған жоқары оқыў орынлары менен байланыслар орнатыў усы тараўдағы әҳмийетли мәселелердиң бирине айланбақта.

Усы мақсетте Әжинияз атындағы Нөкис мәмлекетлик педагогикалық институтында Үргениш мәмлекетлик университети делегациясы, соның менен бирге, Өзбекстан Миллий университети ўәкиллери менен ушырасыў болып өтти. Оған институт профессор-оқытыўшылары ҳәм илимий излениўши докторантлар қатнасты.

Ушырасыўды институт ректоры Байрам Отемуратов басқарып барды. Ушырасыўда Өзбекстан Миллий университети математикалық анализ кафедрасы баслығы, академик Азимбой Саъдуллаев, Үргениш мәмлекетлик университети ректоры Баҳром Абдуллаев, Францияның Тулуза университети профессоры Аҳмад Зарякий, сондай-ақ, академик Жуманазар Базарбаевлар шығып сөйлеп, илимий-педагогикалық тараўда бирге ислесиў, соның менен бирге, жоқары билимлендириў тараўындағы орын алып атырған машқалалар, атап айтқанда, кадрлар таярлаў, илимий изертлеўлердиң нәтийжелерин әмелиятқа енгизиў, сырт ел жоқары оқыў орынлары менен байланыслар орнатыўдың актуаль мәселелерине кең түрде тоқталып, усындай машқалаларды биргеликте сапластырыў ушын мүмкиншиликлерге ийе екенлигин атап өтти.

Ушырасыўда Арал теңизиниң қурыўы ақыбетинде жүзеге келген экологиялық машқалалар, топырақтың шорланыўы сыяқлы мәселелерди илимий аспекттен үйренип, оларға биргеликте шешим табыў бойынша биргеликте жумыслар алып барыўға келисип алынды.

Ушырасыў профессор-оқытыўшылар ҳәм илимий излениўшилер менен сораў-жуўаплар арқалы даўам етти.

Мағлыўмат орнында соны атап өтиў керек, быйылғы оқыў жылында Нөкис мәмлекетлик педагогикалық институты 50 ден аслам сырт ел жоқары оқыў орынлары менен байланыслар орнатқан болып, ол жерлерден тәжирийбели профессор-оқытыўшылар институтта сабақ бериў жумыслары алып барылмақта.

Ислам Матеков,

НМПИ баспасөз хаткери.