Хош хабар! Шет тиллери факультетиниң еки студенти Халықаралық олимпиадада сыйлықланды

.jpeg - Хош хабар! Шет тиллери факультетиниң еки студенти Халықаралық олимпиадада сыйлықланды

Усы жылдың 18-19-февраль күнлери Қазақстан Республикасы Л.Н.Гумилев атындағы Евразия миллий университети филология факультети шет тиллери теориясы ҳәм әмелияты кафедрасы тәрепинен Беларусьтағы Гомель мәмлекетлик университети, Өзбекстандағы Термиз мәмлекетлик университети ҳәм Нөкис мәмлекетлик педагогикалық институты менен биргеликте «Шет тили бойынша муғаллимлерди таярлаў» оқыў бағдарламасы топарлары студентлери – болажақ инлис тили муғаллимлери арасында Халықаралық онлайн олимпиада болып өтти.

 

Олимпиада 2 күн даўам етти. Оған 120 дан аслам студент, соның ишинде, халықаралық жоқары оқыў орынларынан 40 студент қатнасты. Жазба жумыс ҳәм аўызеки сәўбетлесиў тәризинде 2 басқыштан ибарат болған халықаралық олимпиадада Нөкис мәмлекетлик педагогикалық институты шет тиллери факультетиниң 3-курс студентлери де қатнасты.

 

Олимпиада жуўмақларына муўапық, ҳәр бири улыўма 182 баллдан топлаған Нөкис мәмлекетлик педагогикалық институты шет тиллери факультетиниң 3-курс студентлери Миясар Азатбаева ҳәм Қундыз Абдурахманова Халықаралық онлайн олимпиаданың II дәрежели дипломы менен сыйлықланды.

 

Евразия миллий университети филология факультети халықаралық олимпиаданы шөлкемлестириўде бирге ислескени ушын Нөкис мәмлекетлик педагогикалық институты инглис тили ҳәм әдебияты кафедрасы баслығы Алия Тажиеваға миннетдаршылық билдирди.

 

НМПИ баспасөз хызмети.