ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

НМПИ ректорының Жаслар күни мүнәсибети менен байрам қутлықлаўы

Әзиз жаслар!

Мине, өткен төрт жылдан берли елимизде 30-июнь сәнеси Жаслар күни сыпатында кең түрде белгиленбекте.

2017-жыл 30-июнь күни «Камолот» жаслар жәмийетлик ҳәрекетиниң IV қуралтайында шығып сөйлеген Өзбекстан Президенти Шавкат Мирзиёев усы сәнени елимизде Жаслар күни сыпатында белгилеў басламасын алға сүрген еди. Сол жылы 26-августта жәрияланған «Өзбекстан Республикасы жаслары күнин белгилеў ҳаққында»ғы нызамға муўапық, бул байрам ҳәр жылы жоқары көтериңкилик пенен байрамланады.

Быйылғы жылға «Жасларды қоллап-қуўатлаў ҳәм халықтың саламатлығын беккемлеў жылы» деп атама берилиўи де елимизде бул бағдардағы итибардың жоқары екенлигин көрсетип берди.

Жаслық – бул гөззаллық, күш-ғайрат, илҳам-йош ҳәм жеделликке толы болған өмирдиң бир тәкирарланбас паслы есапланады. Ҳәр бир инсан жас ўақтында талпынып, ҳәрекет етсе, әлбетте, буның жемисин өмири даўамында көреди. Солай екен, ҳәзирги ўақытта Президентимиз басшылығында елимизде жасларға болған итибар ҳәм ғамқорлықлардан нәтийжели пайдаланыў, бул арқалы жоқары шеклерге ерисиў ҳәр бириңиздиң тийкарғы мақсетиңиз болыўы керек.

Бүгинги күнде заманагөй пикирлейтуғын, креатив идеяларды әмелге асыратуғын, жоқары потенциалға ийе жас кадрларды таярлаў ҳәм олардың бәнтлигин тәмийинлеў баслы ўазыйпаларымыздың бири есапланады. Өйткени, Президентимиз жаслар менен болған ҳәр бир ушырасыўында айтып өтетуғындай, биз елимизде қандай реформаларды басласақ, ең алды менен, жасларға, жаслардың күш-ғайратына сүйенемиз. Бизиң баслы мақсетимиз болған Үшинши Ренессансты, әлбетте, жаслар менен биргеликте қурамыз! Бул ренессанстың тийкарғы буўыны болса билимлендириў системасы болып есапланады.

Солай екен, бул мақсет жолында елимиздиң барлық жаслары жаңа Өзбекстанда жаңа дәўирди қәлиплестириў ушын әлбетте оқып билим алыўы, илим жолынан беккем барыўы керек. Себеби, илим – ҳәр қандай раўажланыўдың тийкары, бахытқа, жақтылыққа қарай бағдарлайтуғын уллы күш болып есапланады.

Биз усындай жоқары шеклерге ерисиўимиз ҳәм раўажланыўдың тырнағын қалаўымызда пидайы ҳәм ўатанына садық жаслардың мүнәсип үлес қосыўына исеним билдиремиз!

 

Байрам Отемуратов,

Әжинияз атындағы Нөкис мәмлекетлик педагогикалық институты ректоры.