Ózbekstan Respublikası Prezidentiniń qararı

Joqarı bilimlendiriw shólkemlerinde bilim alıw tilegindegi jaslardıń bilim alıwı ushın keń imkaniyatlar beriw, tólemli-kontrakt tiykarında oqıp atırǵan hár bir studentke bilim alıw ushın qolaylı sharayatlar jaratıw, jaslardıń ilimge bolǵan umtılısların bunnan bılay da xoshametlew hám jaslardı qarjılay qollap-quwatlaw maqsetinde:

1. 2021-2022-oqıw jılınan baslap respublikadaǵı barlıq joqarı bilimlendiriw shólkemleri bakalavriatınıń kúndizgi bilimlendiriw túrinde jáne magistratura basqıshında tólemli-kontrakt tiykarında bilim alıw ushın tálim krediti ajıratıwdıń jańa sisteması jolǵa qoyılsın.

Kommerciyalıq bankler Qarjı ministrligi tárepinen jaylastırılatuǵın resurslar esabınan tálim kreditlerin Oraylıq banktiń tiykarǵı stavkasında ajıratatuǵını;

tálim kreditiniń tiykarǵı bólegi studenttiń rásmiy oqıw múddetti tamamlanǵannan soń jetinshi aydan baslap 7 jıl dawamında qaytarılatuǵını;

tálim kreditin rásmiylestiriwde hám onıń qaytarılıwında studenttiń turaqlı dáramat orayına iye bolǵan shańaraq aǵzaları birgelikte qarız alıwshı sıpatında qatnasıwǵa ruxsat etiletuǵını;

«Sociallıq qorǵawdıń birden –bir reestri»ne kirgen shańaraqlar perzentlerinen tálim krediti ushın girew hám kepillikler talap etilmeytuǵını belgilensin.

2. Tálim kreditleri boyınsha kommerciyalıq banklerdi finanslıq resurlar menen támiyinlew ushın Qarjı ministrligi janında Tálim kreditin qarjılandırıw qorı (keyingi orınlarda-Qor) shólkemlestirilsin.

Qorǵa Mámleketlik byudjetten 2021-jılı keminde 1  trillion sum, keyingi jıllarda haqıyqıy talaptan kelip shıǵıp qarjılar ajıratılsın.

Qordıń qarjıların qáliplestiriw dárekleri etip tómendegiler belgilensin:

Mámleketlik byudjetten ajıratılatuǵın qarjılar;

Qor tárepinen aldın ajıratılǵan resurslardıń qaytıwınan túsetuǵın qarjılar hám olardan alınatuǵın procent tólemleri;

Qordıń waqtınsha bos qarjıların kommerciyalıq banklerge jaylastırıw esabınan procentli túsimler;

Xalıqaralıq finans institutlarınıń jeńillikli kreditleri, qáwenderlik, grant qarjıları hám nızamshılıq hújjetlerinde qadaǵan etilmegen basqa da dárekler.

3. Qor yuridikalıq tárep statusına iye bolmaǵan halda Qarjı ministrliginde óz aldına ashılatuǵın jeke ǵazna esap-beti túrinde shólkemlestiriletuǵını;

Qordıń jumısı Qarjı ministrligi Oraylıq apparatına ajıratılatuǵın 3 shtat birliginen ibarat bólim tárepinen ámelge asırılatuǵını;

Qordıń qarjıları esabınan kommerciyalıq banklerdiń sorawlarına tiykarlanıp olarǵa Oraylıq banktiń stavkasında tálim kredit ajıratıwı ushın usı stavkadan 4 procent bántke tómen bolǵan stavkada resurslar ajıratılatuǵını;

Oraylıq banktiń tiykarǵı stavkası tómenlegen jaǵdayda, resurs qarjıları hám tálim krediti boyınsha procent stavkası burınǵısınan basqasha tárizde azaytılatuǵını, arttırılǵan jaǵdayda bolsa ózgerizsiz qalatuǵını belgilep qoyılsın.

4. Ministrler Kabineti eki hápte múddette tómendegilerdi názerde tutatuǵın Qarjı Ministrligi janında Tálim kreditin qarjılandırıw qorı esabınan joqarı bilimlendiriw shólkemlerinde tólemli-kontrakt tiykarında oqıw ushın tálim kreditlerin ajıratıw haqqındaǵı rejeni tastıyıqlasın:

tálim kreditleri boyınsha júzege keletuǵın kredit táwekelshiligin Qarjı ministrligi hám kommerciyalıq bankler arasında bólistiriw jáne Qordan ajıratılǵan qarjılardıń bir bólegin kommerciyalıq bankler tárepinen girew depoziti sıpatında qabıl etiw;

respublikadaǵı mámleketlik joqarı bilimlendiriw mákemeleri, jeke menshik hám sırt el joqarı bilimlendiriw shólkemleri  jáne olardıń filiallarınıń studentlerine kontrakt tólemleri ushın kredit ajıratıw;

Qor tárepinen tálim kreditleri ushın qarjılar ajıratıwda kommerciyalıq banklerge qoyılatuǵın muwapıqlılıq normaların ornatıw.

5. Qarjı ministrligi Qorǵa 2021-jılı qarjılardıń Mámleketlik byudjet hám mámleketlik maqsetli qorlarınıń qarjıları, byudjetti qollap-quwatlaw ushın tartılatuǵın xalıqaralıq finans institutları hám sırt el húkimetiniń finans shólkemleriniń kreditleri, suveren xalıqaralıq obligaciyalardı shıǵarıw hám nızamshılıq hújjetleri menen qadaǵan etilmegen basqa da dárekler esabınan ajıratılıwın, 2022-jıldan baslap bolsa Mámleketlik byudjet parametrlerinde názerde tutılıwın támiyinlesin.

6. Joqarı hám orta arnawlı bilimlendiriw ministrligi mápdar ministrlikler hám uyımlar menen birgelikte bir ay múddette nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin.

7. Usı qarardıń orınlanıwın qadaǵalaw Ózbekstan Respublikası Bas ministriniń orınbasarı B.A.Musaevqa, joqarı hám orta arnawlı bilimlendiriw ministri A.X.Toshqulovqa hám qarjı ministri T.A.Ishmetovqa júklensin.

Ózbekstan Respublikası

Prezidenti Sh.MIRZIYOEV

Tashkent qalası,

2021-jıl 30-iyul.

 

Qaraqalpaqstan xabar agentligi.