ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Institutta jańa oqıw jılına tayarlıq barısı úyrenildi

Ózbekstan Respublikası Prezidenti Sh.Mirziyoev basshılıǵında usı jıldıń 16-iyun kúni «Joqarı bilimlendiriw tarawındaǵı reformalardıń nátiyjeliligi hám jańa oqıw jılına tayarlıq processleri haqqında» ótkerilgen videoselektor jıynalısında belgilep berilgen wazıypalardan kelip shıǵıp, 2021-2022-oqıw jılına tayarlıq barısı Joqarı hám orta arnawlı bilimlendiriw ministrligi jáne Ministrler Kabineti janındaǵı Bilimlendiriwdiń sapasın qadaǵalaw boyınsha mámleketlik inspekciyasınıń juwapker wákilleri tárepinen orınlarǵa shıǵıp úyrenilmekte.

Búgin, 19-avgust kúni Ájiniyaz atındaǵı Nókis mámleketlik pedagogikalıq institutında jańa oqıw jılına tayarlıq barısın úyreniw jumısları alıp barıldı.

Joqarı bilimlendiriwdi rawajlandırıw izertlewleri hám aldınǵı texnologiyalardı engiziw orayınıń direktorı wazıypasın atqarıwshı, jumısshı topar baslıǵı M.Esanov basshılıǵındaǵı juwapker qánigeler institut kafedralarınıń baslıqları, tiyisli juwapkerler menen ushırasıp, úyreniw jumıslarınıń maqseti hám wazıypaları haqqında maǵlıwmat berdi.

Ilajda baslı maqset – joqarı bilimlendiriwde sapalıq kórsetkishlerdi jaqsılaw, anıqlanǵan, orın alıp atırǵan kemshilikler, mashqalalardı sheshiwge metodikalıq jaqtan járdem beriw, professor-oqıtıwshılar, tiyisli juwapkerlerdiń bilim hám kónlikpelerin arttırıwdan ibarat ekenligi atap ótilip, bul baǵdarda jumısshı topar baslıǵı M.Esanov basshılıǵında seminar ótkeriw boyınsha kelisip alındı.

Jumısshı topar aǵzaları Mámleketlik bilimlendiriw standartları, kónlikpe talapları hám oqıw jobaları, sonday-aq, pán baǵdarlamalarınıń islep shıǵılǵanlıǵı jáne tastıyıqlanǵanlıǵı, kredit-modul sistemasınıń talap dárejesinde islep shıǵılǵanlıǵı, tiyisli normativlik hám oqıw-metodikalıq hújjetlerdiń jańa oqıw jılına tayarlıǵı menen baylanıslı maǵlıwmatlardı kózden ótkerdi.

NMPI baspasóz xızmeti.