Ózbekstan Respublikası Ǵárezsizliginiń 30 jıllıǵına baǵıshlanadı

Elimizdiń óz ǵárezsizligin qolǵa kirgizgeni hám erkin rawajlanıw jolın baslaǵanlıǵına 30 jıl toldı. Ǵárezsizlik xalqımız ushın óz táǵdiriniń haqıyqıy iyesi bolıp, qádir qımbatın ańlap, múnásip ómir súriw, elimizde huqıqıy demokratiyalıq mámleket hám puqaralıq jámiyetti qurıw imkaniyatın jaratıp berdi. Házirgi kúnde ol hár bir insannıń ekonomikalıq, sociallıq tarawlarda talantı hám qábiletin tolıq júzege shıǵarıwı, huqıq hám erkinliklerin támiynlewdiń bekkem negizi sanaladı.

Ǵárezsizlik jıllarında áyyemgi tariyxımız, bay miyrasımız, milliy mámleketshiligimiz, muqáddes dinimiz, úrp-ádet hám dástúrlerimiz qayta tiklendi. Búgingi kúnde mehir-miriwbet, keńpeyillik hám awızbirshilik sıyaqlı joqarı pazıyletler, milliy hám ulıwmainsanıy qádiryatlarǵa hurmet, Watan táǵdiri hám keleshegine biyparıq bolmaw sezimleri júrek tórimizden orın aldı.

Mámleketimiz ǵárezsizliginiń 30 jıllıǵın belgilew qarsańında ótken dáwirler dawamında basıp ótilgen awır jolımızǵa jáne bir názer taslaw, erkin rawajlanıwımız dawamında ámelge asırılǵan jumıslar, erisilgen nátiyjelerge haqıyqıy baha beriw hám olardıń áhmiyetin keń jámiyetshilik, pútkil xalqımızdıń itibarına jáne bir mártebe jetkeriw maqsetke muwapıq, degen oydamız.

Haqıyqatında da, ǵárezsizlik sebepli ózligimizdi ańladıq, azat xalıq, Ǵárezsiz mámleket sıpatında Ózbekstannıń bar imkaniyatların, úlken potencialın pútkil dúnyaǵa kórsetiw múmkinshiligi jaratıldı. Azatlıq sebepli bizdi jáhán tanıdı, xalqımızdıń pidákerlik miyneti, jaslarımızdıń kúsh-ǵayratı, talpınısları nátiyjesinde Watanımızdıń abroyı álem boylap artıp barmaqta. Erkinlik bergen usınday imkaniyatlar arqalı erteńgi kúnimiz – erkin hám párawan keleshegimizdi óz qolımız benen qurmaqtamız.

«Ǵárezsizlik» hám «reforma» túsiniklerine ilahıy sózler sıpatında qarawımız tábiyiy. Sebebi, tek ǵárezsiz mámleket hám erkin jámiyette ǵana reformalardı ámelge asırıw múmkin. Ǵárezsizlik te, reformalar da insannıń jaqsı jasawı, múnásip turmıs dárejesine erisiwi xalqımız ushın zárúr shárayat jaratıwı tábiyiy.

Mámleketimizde ǵárezsizlik jıllarında alıp barılǵan keń kólemli reformalar nátiyjesinde milliy mámleketshiligimizdiń irgesi bekkemlenip, elimiz suvereniteti, shegaralarımızdıń bekkemligi támiynlendi. Jámiyetimizde tınıshlıq hám párawanlıq, milletler aralıq tatıwlıq hám de keńpeyillik ortalıǵanın kúsheytiw, nızam ústemligi, insan huqıq-erkinliklerin hám máplerin júzege shıǵarıw, nızam ústemligi boyınsha keń kólemli jumıslardı birgelikte ámelge asırmaqtamız.

Ekonomikada adminstrativlik buyrıqpazlıqqa tiykarlanǵan eski basqarıw sistemasınan waz keship, bazar ekonomikasına basqıshpa-basqısh ótilgenligi, pul-kredit siyasatı puqta oylap alıp barılǵanlıǵı, kishi biznes hám jeke isbilermenlik, fermerlik háreketi ushın jol ashıp berilgenligi makroekonomikalıq turaqlılıqtı, ekonomikanıń joqarı pátler menen rawajlanıwın támiynlew, inflyaciyanı prognoz kórsetkishleri dárejesinde saqlap qalıw, eń áhmiyetlisi, xalqımızdıń turmıs dárejesin asırıwda sheshiwshi áhmiyetke iye bolmaqta.

Házirgi waqıtta mámleketimiz basıp ótken rawajlanıw jolınıń tereń analizi búgingi kúnde dúnya bazarında konyuktura ózgerip, básekileslik barǵan sayın kúsheyip baratırǵanlıǵın hár tárepleme esapqa alıwdı, sol tiykarda mámlektimizdi jánede turaqlı hám jedel túrde rawajlandırıw ushın ulıwma jańasha strategiyalıq jantasıw hám princplerdi islep shıǵıw, ámelge asırıwdı talap etpekte.
Alıp barılıp atırǵan reformalar nátiyjeliligin jánede asırıw, mámleket hám jámiyet rawajlanıwın jańa basqıshqa kóteriw, turmıstıń barlıq tarawların liberallastırıw, mámleketimizdi modernizaciyalaw boyınsha eń áhmiyetli baǵdarlardı ámlege asırıw maqsetinde pútkil xalqımız, ásirese, onıń eń belsendi qatlamına aylanıp baratırǵan isbilermenlerdi oylandırıp atırǵan mashqalalı máselelerdi hár tárepleme úyreniw, ámeldegi nızamshılıq, huqıqtı qollanıw hám aldıńǵı dúnya júzlik tájiriybeni analizlew tiykarında 2017-2021-jıllarda Ózbekstan Respublikasın rawajlandırıwdıń bes áhmiyetli baǵdarı boyınsha Háreketler strategiyası islep shıǵıldı hám Ózbekstan Respublikası Prezidenti tárepinen tastıyıqlandı.

Demokratiyalıq reformalardı tereńlestiriw hám mámleketimizdi modernizaciyalawda parlamenttiń rolin jánede kúsheytiw, mámleket basqarıwı hám mámleketlik xızmettiń huquqıy-shólkemlestiriwshi tiykarların rawajlandırıw, mámlekettiń ekonomikasın tártipke salıw boyınsha funkciyaların qısqartıw, «bir ayna» princpi boyınsha mámleketlik xızmetler kórsetiw sistemasın engiziw, jámáátshilik qadaǵalaw mexanizmlerin ámeliyatqa engiziw hám puqaralıq jámiyeti institutları hám de ǵalaba xabar quralları rolin kúsheytiw jolında mámleket hám jámiyet qurılısın jetilistiriwdi óz ishine aladı.

Sud hákimiyatınıń shın mánidegi ǵárezsizligin, puqaralardıń huqık hám erkinliklerin isenimli qorǵaw kepilliklerin támiynlew, puqaralarımız tárepinen ádil sudlawǵa erisiw dárejesin asırıw, jınayatshılıqqa qarsı gúresiw hám huqıqbuzarlıqtıń aldın alıw sistemasın jetilistiriw, sud procesinde tartısıw princplerin tolıq engiziw, yuridikalıq járdem hám xızmetler sapasın túp-tiykarınan jaqsılaw ushın nızam ústemligin támiynlew hám de sud-huqıq sistemasın reformalawǵa jánede itibardı kúsheytiwdi óz aldına maqset etti.

Sociallıq tarawdı rawajlandırıwǵa baǵdarlanǵan xalıqtıń bántligi hám real dáramatların turaqlı asırıp barıw, sociallıq qorǵaw hám den sawlıqtı saqlaw sistemasın jetilisiriw, hayal-qızlardıń jámiyetlik-siyasiy belsendiligin arttırıw, arzan úy-jaylar qurıw, jol-transpot, injenerlik-kommunikaciya hám sociallıq infrosistemalardı rawajlandırıw hám de modernizaciyalaw boyınsha maqsetli baǵdarlamalardı ámelge asırıw, bilimlendiriw, mádeniyat, ilim-pán, ádebiyat, kórkem-óner hám sport tarawların rawajlandırıw, jaslarǵa tiyisli mámleketlik siyasattı jetilistiriw sıyaqlı keń kólemli jumıslar alıp barılmaqta.

Qáwipsizlik, milletleraralıq tatıwlıq hám diniy keńpeyillikti támiynlew, tereń oylanılǵan, óz ara máplerge say hám ámeliy ruwxtaǵı sırtqı siyasat júritiwge baǵdarlanǵan mámleketimiz ǵárezsizligi hám suverenitetin bekkemlew, Ózbekstannıń átirap-aymaǵında qáwipsizlik, turaqlılıq hám tatıw qońsıshılıq ortalıǵın qáliplestiriw, mámleketimizdiń xalıqaralıq abroyın bekkemlew baslı maqsetlerimizden biri bolıp barmaqta.

Hár qanday ideya, egerde ol keleshekke bolǵan isenimdi bekkemlese, jámiyettiń kúshi hám resursların qamtıy alǵanda ǵana nátiyjege erisiwi múmkin. Sonı maqtanısh penen aytıw lazım, xalıqtıń túrli qatlamları bildirip atırǵan pikirler, usınıslar Háreketler strategiyası joybarı xalqımızdıń jaratıwshılıq potencialın jánede keń túrde júzege shıǵarıp, puqaralarımızdı joqarı maqsetler jolında birlestire alatuǵınlıǵın kórsetti.

Ǵárezsizlik jıllarında Qaraqalpaqstan Respublikasınıń social-ekonomikalıq, jámiyetlik hám mádeniy turmısında da aytarlıqtay jańalanıwlar júz berdi. Bazar ekononmikası shárayatında xalıqtıń turmıs dárejesin jaqsılaw, kishi isbilermenlikti qollap-quwatlaw, awıl xojalıǵı, bilimlendiriw, qurılıs, den sawlıqtı saqlaw, mádeniyat hám sport tarawların rawajlandırıw mámlektimiz siyasatınıń baslı maqsetine aylandı.

Ásirese, húkimetimiz tárepinen sońǵı 5 jıl dawamında alıp barılıp atırǵan túpkilikli reformalar Respublikamız tariyxında ayrıqsha orın iyeledi. Házirgi kúnde barlıq qala ham rayon orayları, «Abat máhálle» baǵdarlamasına kirgizilgen awıl hám mákan puqara jıyınlarında úlken abadanlastırıw, kóklemzarlastırıw jumısları alıp barılıp, misli kórilmegen qurılıs maydanına aylandı.
Aral teńizi aymaǵında ekologiyalıq mashqalalardı saplastırıw maqsetinde teńiz ultanındaǵı 1,5mln gektar jer maydanlarına hár qıylı shólge shıdamlı ósimlikler egilip, jasalma toǵayzarlıqlar, balıqshılıqqa mólsherlengen kóller payda etiw arqalı atmosferanıń birqansha jaqsılanıwına erisildi. Alıp barılǵan iri kólemli jumıslar sheńberinde Moynaq rayonı házirgi kúnde zamanagóy qala tipinde, pútkilley jańasha kóriniste shıray ashtı. Rayon xalqı ushın úlken mashqala bolıp kelgen tábiyiy gaz, ishimlik suwı menen tolıq támiynlenip, puqaralardıń turmıs-tárzi ádewir jaqsılandı.
Prezidentimizdiń arnawlı Pármanı tiykarında Respublikamızdıń shetki aymaqlarınan espalanǵan Bozataw rayonı qayta tiklenip, rayon orayında kózdi quwandırarlıq ózgerisler júz bere basladı. Házir bul jerde keń hám ráwan jollar, mektepler, sport maydanshaları, xalıqqa turmıs xızmetin kórsetiw orayları qurılıp, paydalanıwǵa tapsırıldı. Rayonnıń qayta shólkemlestiriliwi awıl xojalıǵın, sonıń ishinde sharawshılıq xojalıqların rawajlandırıwǵada keń imkaniyatlar jaratıp, respublikamızdıń ekonomikalıq dárejesiniń elede artıwına jol ashıp berdi.

Respulikamız xalıq xojalıǵınıń barlıq tarawları sıyaqlı keyingi jıllarda bilimlendiriw tarawında da mámleketimiz tárepinen alıp barılıp atırǵan reformalardıń nátiyjeli jemisleri óz kórinisin tappaqta. Bilimlendiriwdiń dáslepki buwınları sanalǵan mektepke shekemgi bilimlendiriw mákemeleri, ulıwma bilim beriw mektepleri hár jıl sayın mámleketlik baǵdarlamalar, arnawlı joybarlar tiykarında zamanagóy tárizde qurılıp, eskirgenleri qayta rekonstrukciyalanıp, olardıń materiallıq-texnikalıq bazası anaǵurlım dárejedi bekkemlenip, qamtıp alıw dárejesi Ózbekstanda eń aldınǵı orında 71 payızdı quramaqta.

Sońǵı jıllarda bilimlendiriw tarawındaǵı ámelge asırılǵan úlken ózgerisler nátiyjesinde orta bilim beriw mákemeleri jumısları qayta muwapıqlastırılıp, akademiyalıq liceyler, kósip-óner mektepleri hám texnikumlarda bilim beriw jańa úlgide alıp barılmaqta. Bunda tájiriybeli muǵallimler hám ustazlar jas áwladtı óz qızıǵıwshılıǵına qaray qánigelikke maqsetli tayarlaw, olardı belgili bir kásipke baǵdarlaw arqalı aydın keleshegine jol ashıwda jemisli miynet etpekte.

Joqarı bilimlendiriw sistemasın rawajlandırıw baǵdarında alıp barılıp atırǵan jańalanıwlar nátiyjesi gúllán Qaraqalpaqstan xalqı, ásirese, jaslarımız ushın da quwanıshlı jańalıqlardı inam etti. Respublikamızda burın 6 joqarı ornı jaslarǵa bilim berip kelgen bolsa, házirgi kúnge kelip olardıń sanı 10 ǵa jetti.

Biziń miynet etip atırǵan jámáátimiz, óziniń 87 jıldan aslam tariyxına iye Qaraqalpaqstandaǵı dáslepki joqarı oqıw ornı esaplanǵan Ájiniyaz atındaǵı Nókis mámleketlik pedagogikalıq institutı da Ǵárezsizlik jılları úlken imkaniyatlar qushaǵında óziniń jańasha rawajlanıw jolına ótti.

Usı kúnge shekem institutımız pitkeriwshileri arasında pútkil Ózbekstanǵa hám dúnya ellerine belgili bolǵan mámleketlik iskerler, sonıń ishinde xalıq xojalıǵı, mádeniyat hám ilim ǵayratkerleri sanalaǵan insanlar túrli jıllarda bilim alıp, búgingi kúnde olardıń ómir jolı jaslarǵa órnek hám turmıslıq tájiriybe mektebi xızmetin atqarıp kelmekte.

Solardıń ishinde instituttan tálim-tárbiya alǵan elimizge belgili tulǵalar Ǵárezsizlik jıllarında mektep muǵallimi, kóplegen sawaplı isleri menen tanılǵan Allaniyaz Óteniyazov, Ózbekstan hám Qaraqalpaqstan xalıq jazıwshısı Tólepbergen Qayıpbergenov, Ózbekstan hám Qaraqalpaqstan xalıq shayırı Ibrayım Yusupov, Xiywa qalası 20-sanlı mehribanlıq úyi direktorı Vera Borisovna Pak hám Tariyx ilimlerininń kandidatı, professor Ǵayratdin Xojaniyazovlar Ózbekstan Qaharmanları ataǵına miyasar bolıp, xalqımızdıń maqtanıshına aylandı.

Ózbekstanda joqarı oqıw orınlarınıń milliy hám xalıqaralıq reytingin asırıw maqsetinde Ózbekstan Respublikası Prezidentiniń «Ózbekstan Respublikası joqarı oqıw sistemasın 2030-jılǵa shekem rawajlandırıw koncepciyasın tastıyıqlaw haqqında»ǵı Pármanı talapların orınlaw maqsetinde aytarlıqtay jumıslar ámelge asırıldı. institut imidjin jánede kóteriw, onı xalıqaralıq tán alınǵan QS (Quacquarelli Symonds) reytingi talaplarına sáykeslendiriw, respublika ilimiy hám joqarı oqıw orınlarınıń investiciyalıq sapasın arttırıw, maman kadrlardı tayarlaw tarawındaǵı birge islesiwdi rawajlandırıw jumısların jolǵa qoyıw nátiyjesinde búgingi kunde dunyanıń eń rawajlanǵan 16 mámleketindegi bir qatar joqarı oqıw orınları: Rossiya Federaciyasınıń Moskva mámleketlik pedagogika universiteti, Sochi mámleketlik universiteti, Kuban mámleketlik universiteti, Rossiya Federaciyasınıń Shıǵıstanıw institutı, Turkiyanıń Ankara universiteti, Stanbul universiteti, Pamukkale universiteti, Qazaqstan Evro Aziya gumanitar institutı, Yassawiy atındaǵı qazaq-túrk Xalqararalıq universiteti, Franciyanıń INSHA institutı, Abay Mırzaxmetov atındaǵı Kókshetaw universiteti, Qırǵızstannıń Narın mámleketlik universiteti, Portugaliyanıń Guardo texnika universieti, Belorussiya mámleketiniń Milliy Ilimler akademiyasi Oraylıq Botanika baǵı menen birge islesiw boyınsha 32 shárnama hám memorandumlar dúzilgen. Sonıń menen birge institut TOP-1000lıqqa kirgen 9 shet el joqarı oqıw orınları (Turkiyanıń Ankara universiteti, Turkiyanıń Stambul universiteti, Turkiyanıń Firat universiteti, Rossiya Federaciyasınıń Moskva mámleketlik pedagogika universiteti, Rossiya Federaciyasınıń Lomonosov atındaǵı universiteti, Belorussiya mámleketiniń Milliy Ilimler akademiyasi Oraylıq Botanika baǵı, Qazaqstan Respublikasınıń M.Auezov atındaǵı universiteti, Qazaqstan Respublikasınıń L.N.Gumilyov atındaǵı universiteti, Pakistannıń Panjab universiteti) menen óz ara shárnamalar hám memorandumlar tastıyıqladı.

Alıp barılıp atırǵan xalıqaralıq birge islesiw jumısları nátiyjesinde Rossiyanıń jetekshi universitetlerinen biri sanalǵan Kuban mámleketlik universiteti menen qospa baǵdarlamalar tiykarında studentlerdi oqıtıw, fakultet hám kafedralar filialların shólkemlestiriw, oqıtıwshılardıń qánigeligin asırıw, jańadan-jańa birge islesiw baǵdarların jolǵa qoyıw boyınsha shárnamalar dúzildi hám ámeliy nátiyjelerge erisilmekte.

Institut «Kadrlar tayarlaw milliy baǵdarlaması»nıń maqset hám wazıypalarınan kelip shıǵıp, Respublikamız xalıq bilimlendiriw salasınıń rawajlanıwın támiyinleytuǵın problemalı baǵdarlarda orınlanatuǵın fundamental, ámeliy hám innovaciyalıq izertlew jumısların kompleksli tárizde alıp barıw, joqarı ilimiy dárejeli pedagog kadrlar tayarlawdıń sapasın asırıw maqsetinde oqıw-metodikalıq ádebiyatlar jaratıw ústinde islew boyınsha ilimiy-teoriyalıq hámde ámeliy-metodikalıq másláhát xızmeti, ilimiy tájiriybeler ótkeriw, ilimiy bazalardı rawajlandırıw hám óz-ara járdem kórsetiw máseleleri boyınsha birgelikte nátiyjeli jumıslar alıp barmaqta.

Sońǵı jıllar dawamında elimiz jaslarınıń oqıtıwshılıq kásibine degen kızıǵıwshılıq hám mehir artıp barmaqta. Mısalı, bunnan 5 jıl burın institutta studentler sanı 5, 325 ti quraǵan bolsa, búgingi kunge kelip, 16 765 student tálim alıp atırǵanı pikrimiz daliyli.

Ǵarezsizliq jıllarında instituttıń ilimiy potencialın da belgili dárejede arttırıwǵa erisilidi. Atap aytqanda isntitut boyınsha ilimiy potencial 2016-jılı (436 professor-oqıtıwshı islegen) 29,7 payızdı quraǵan bolsa, 2021-jılǵa kelip (548 professor-oqıtıwshıdan) 35 payızǵa jetti. Sonday-aq, házirgi kúnge kelip 8 professor-oqıtıwshı rawajlanıw texnologiyaların jaratqan bolsa, 6 professor-oqıtıwshı túrli baǵdarlarda grant joybarların jeńip alıp, óz jumısların nátiyjeli dawam ettirmekte.

Instituttıń materiallıq-texnikalıq bazasın jıldan jılǵa jaqsılaw boyınsha bir qansha jumıslar ámelge asırılıp atır. Házirgi kúnde institut quramında 11 fakultet hám sırtqı oqıw bólimi hám magistratura bólimi jumıs alıp barmaqta. Oqıw binaların rekonstrukciyalaw, oqıw xanaların zamanagóy texnikalıq qurallar menen támiynlew jumısları hár oqıw jılında qolǵa alınıp kelinbekte. Sonday-aq, búginigi kúnde Ózbekstan Respublikası Prezidentiniń 2017-jıl 20-apreldegi “Joqarı bilimlendiriw sistemasın jánede rawajlandırıw is-ilajları haqqında”ǵı PQ-2909-sanlı Qararına tiykarlanıp instituttıń 2000 orınǵa mólsherlengen jańa oqıw imaratınıń qurılısı ushın 54000,0 mln swm qarjı ajıratılıp, 2021-jılda paydalanıwǵa tapsırılıwı kútilmekte.

Institut aymaǵındaǵı qurılısı eskirgen 400 orınǵa mólsherlengen Talabalar turur jayı imaratında Ózbekstan Respublikası Joqarı ham orta arnawlı bilimlendiriw ministrligi menen kelisilgen halda byudjetten tısqarı qarjılar esabınan 3,8 mlrd sum qarjı ajıratılıp, rekonstrukciya jumısları jedel pátler menen alıp barılıp, jaqın waqıtlar aralıǵında paydalanılıwǵa tapsırılıwı rejelestirilmekte.

Aralıqtıń uzaq bolıwı wálayatlar hám alıs rayonlardan Nókis qalasına kelip bilim alıwdı qálewshi jaslar ushın bir qansha mashqalalardı payda etip kiyatırǵan edi. Ata-analar hám student-jaslardıń baslaması hám de Ministrler Kabinetiniń tiyisli hújjetleri tiykarında “Ellikqala pedagogika fakulteti”niń ashılıwı xalqımız kewlin kuwanıshqa bólegen ámeliy is boldı. Fakultet aymaǵında jaylasqan, jámi 300 orınǵa mólsherlengen 1 hám 2-sanlı jataqxanalar ushın 1194,3 mln sum ajıratılıp, qısqa múddet ishinde kapital remontlandı. Oqıw binası hám Talabalar turar jayı ushın aymaqtaǵı ıssılıq tarmaǵı hám trassasına 745,4 mln sum sarplanıp, tolıq juwmaqlanıp, paydalanıwǵa tapsırıldı.

Institut akademiyalıq liceyinde jas talantlı oqıwshılardı maqsetli tayalaw, jas oqıtıwshılardı qollap-quwatlaw olardı keleshekte joqarı oqıw orınlarına maqsetli tayarlaw jumıslarıda alıp barılmaqta.
Student-jaslar menen jaqınnan islesiw, olardıń mashqalaların óz waqtında saplastırıw, usınıs-pikirlerin ámelge asırıw, talantı hám de qábiletlerin júzege shıǵarwda olardı xoshametlep barıw maqsetinde, Ózbekstan Respublikasındaǵı Joqarı oqıw orınları arasında dáslepki márte institutımızda «Studentler Keńesi» sisteması engizildi. Keyingi 3 jıl dawamında student-jaslarımızdıń xalıqaralıq hám respublikalıq kólemde jeńisli nátiyjelerdi qolǵa kirgiziwi, studentler arasında jınayatshılıq hám huqıqbuzarlıq halatlarınıń ushıraspawı – usı sistemanıń eń baslı jetiskenliklerinen sanaladı.

Álbette, jaratılıp atırǵan usınday imkaniyatlardan únemli paydalanıp atırǵan talantlı student-jaslarımızda Mámleketimiz Ǵárezsizligi jıllarında ilim, mádeniyat hám kórkem-óner, sport tarawlarında salmaqlı nátiyjelerdi qolǵa kirgizip, elimiz abroyın jáhán arenalarında jemisli qorǵap kelmekte. Institutımızda ótken jıllar dawamında 3 Zulfiya atındaǵı sıylıqtıń laureatı, 7 «Nihol» sıylıǵı iyesi, 50 den aslam Jáhán chempionatları jeńimpazları, 150 Aziya hám 360 tan aslam Respublika kólemindegi sport jeńimpazları jetilisip shıqtı.

Usı tabıslardı qolǵa kirgiziwde institutımızda shólkemlestirilgen Ózbekstan Respublikası kóleminde bir neshe márte chempion hám Kubok iyesi, NMPI qızlar komndası (Bir neshe marte chempion hám absolyult chempion), NMPI fotbol komandası, «Tumaris» qosıq hám ayaq oyın xalıq ansabli, «Turan» Quwnaqlar hám ziyrekler komandası aytarlqtay maqtawlarǵa turarlıq. Sonday-aq, «Zakovot» itellketual oyınlarında instituttıń «Ziyalı jaslar klubı» aǵzaları Respublika kóleminde tanıldı. Jas háweskerler quramınan ibarat «Sıyperde», «Tarannum» hám «Dugonalar» ansamblleri álle qashan-aq institut hám respublikalıq kólemdegi repertuarların dawam ettirmekte.

Sonıń menen birge, jaslarımız xalıqaralıq hám respublikalıq kólemdegi konferenciyalarda, kórik-tańlawlarda ózleriniń tereń bilimi, intellektual qábileti menen dúnya xalıqlarınıń názerine tústi.
Solay etip, Ǵárezsizligimizdiń alǵa rawajlanıwı dáwirinde jámiyetimizdiń barlıq qatlamı menen birgelikte institutımız jámááti teń qádemler atıp háreket etip atırǵanlıǵı, xalqımızdıń úlken jetiskenlikleri, rawajlanıwdıń jańa tabıslarına erisiwine keleshekte xalqımızdıń turmıs dárejesin jánede asırıw imkaniyatın beredi degen oydamız.

Respublikamızdıń gúllán xalqın institutımızdıń keń jámáátshiligi atınan ǵárezsizligimizdiń 30 jıllıq qutlı bayramı menen shın júrekten qutlıqlay otırıp, elimiz ǵárezsizligin jáne de bekkemlew, onıń gúllep-jasnawına múnásip úles qosıwda tawsılmas kúsh-ǵayrat tileymiz!

Quvondiq Qadirov,
Ájiniyaz atındaǵı NMPI Jaslar menen islesiw
hám ruwxıy-aǵartıwshılıq isleri boyınsha prorektorı.