Joqarı oqıw orınlarınıń bakalavriat tálim baǵdarlarına kiriw test nátiyjeleri járiyalanǵannan soń abiturientler tárepinen qosımsha kontrakt (xalıqtıń tilinde «super kontrakt») boyınsha kóplegen sorawlar berilmekte. Biz ótken jıllardaǵı ámeliyatta toplanǵan tájiriybelerge tiykarlanıp, «super kontrakt»ti esaplaw boyınsha azlı-kem túsinik beriwge háreket ettik.

Qosımsha tólemli kontrakt muǵdarı ámelde ornatılǵan tólemli kontrakt muǵdarına salıstırmalı tómendegi muǵdarlarda belgilenedi:

1-kategoriya
Kiriw sızıǵına 4 ball jetpegenler salıstırmalı birqansha arzan kontrakt tóleydi. Yaǵnıy:

1 ballǵa shekem jetpegen abiturientler ushın – 1,5 ese;
1,1 balldan 2 ballǵa shekem jetpegen abiturientler ushın – 2 ese;
2,1 balldan 3 ballǵa shekem jetpegen abiturientler ushın – 2,5 ese;
3,1 balldan 4 ballǵa shekem jetpegen abiturientler ushın – 3 ese.

2-kategoriya
56,7 balldan kóp toplaǵan, biraq kiriw sızıǵına 4 balldan kóbirek jetpey qalǵan abiturientler kontrakt summasınıń 10 esesinen kóbirek muǵdarda tóleydi.

Bıyılǵı jılı 2-kategoriya ushın bahalar ele tastıyıqlanbadı. Sonday-aq, ótken jıldan berli super kontrakt bahaların joqarı oqıw orınlarınıń ózleri belgilewi jolǵa qoyılǵan.

3-kategoriya
56,7 balldan az toplaǵanlar (máselen, 1 ball bolsa da) 2-kategoriyadaǵı super kontrakt muǵdarınıń 2 esesin tólep oqıwı múmkin. Máselen, ápiwayı super kontrakt 15 ese bolsa, 56,7 balldan az toplaǵanlar 30 esesin tólep, super kontraktta oqıwı múmkin.

Qosımsha kontrakt bir márte tólenedi. Birinshi oqıw jılın pitkergennen soń keyingi jıllarda hámme qatarı ápiwayı kontraktti tólep oqıy beredi.

Esletip ótiw orınlı, ótken jıldaǵı ámeliyatta abiturient ózi saylaǵan birinshi baǵdarǵa kire almaǵan, biraq 2-, 3-, 4- yamasa 5-baǵdarlardıń birine oqıwǵa kirgen bolsa, onda óz qálewi menen birinshi saylaǵan baǵdarında super kontraktta oqıwına ruxsat berilgen edi.

Sonday-aq, saylaǵan bes baǵdarǵa da oqıwǵa kire almaǵan abiturientler qálegen bes baǵdardıń birin saylap, super kontraktte oqıwına ruxsat berilgen edi.

Jáne bir márte esletip ótemiz, bul ótken jıllarda toplanǵan tájiriybelerden kelip shıǵıp tayarlanǵan material. Bıyılǵı jılı «super kontrakt» boyınsha qanday ózgerisler bolıwın biz anıq bilmeymiz. Solay eken, rásmiy dáreklerdi baqlawdı dawam etemiz.

Islam Matekov,
NMPI baspasóz xatkeri.