ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Tólemli kontrakt tiykarında oqıw ushın tálim kreditlerin ajıratıw tártibi haqqında

Ózbekstan Respublikası Ministrler Kabinetiniń 2021-jıl 18-avgusttaǵı «Joqarı bilimlendiriw mákemelerinde tólemli kontrakt tiykarında oqıw ushın tálim kreditlerin ajıratıwdı tártipke salıw ilajları haqqında»ǵı 527-sanlı qararı tiykarında Qarjı ministrligi janındaǵı Tálim kreditin qarjılandırıw qorı esabınan joqarı oqıw orınlarında tólemli kontrakt tiykarında oqıw ushın tálim kreditlerin ajıratıw tártibi haqqındaǵı reje tastıyıqlandı.

Usı rejege muwapıq, tálim kreditleri joqarı oqıw orınlarınıń kúndizgi tálim baǵdarlarında bakalavriat hám magistraturaǵa tólemli kontrakt tiykarında oqıwǵa usınıs etilgen, sonday-aq, oqıwın kóshirgen Ózbekstan puqarası bolǵan studentlerge beriledi.

Bunda kredit alıwshınıń turaqlı dáramat dáregine iye shańaraq aǵzaları (ata-anası, aǵa-inisi, apa-qarındası (sińlisi), kúyewi yamasa hayalı) yamasa qayırqomları birgelikte kredit alıwshı sıpatında qatnasıwı múmkin.

Tálim kreditiniń tiykarǵı qarızı studenttiń rásmiy oqıw múddeti juwmaqlanǵannan soń jetinshi aydan baslap 7 jıl dawamında qaytarıladı.

Tálim kreditin alıw ushın Qarjı ministrliginiń rásmiy veb-saytında járiyalanǵan kommerciyalıq banklerge tómendegi hújjetler usınıladı:

— arza;
— tólemli kontrakt shártnaması hám oǵan qosımsha etiletuǵın esap beti/fakuturası (eger bolsa). Shártnamada oqıwdı juwmaqlawdıń belgilengen múddeti hám bir jıl ushın tólem muǵdarı kórsetilgen bolıwı kerek;
— tálim krediti qaytarılıwınıń támiynatı boyınsha hújjet. Bunda «Sociallıq qorǵawdıń birden-bir reestri»ne kirgen shańaraqlardıń perzentlerine ajıratılatuǵın tálim krediti boyınsha girew hám kepillik talap etilmeydi;
— «Sociallıq qorǵawdıń birden-bir reestri»ne kirgizilgenin tastıyıqlawshı maǵlıwmatnama («Sociallıq qorǵawdıń birden-bir reestri»ne kirgizilgen shańaraqlardıń perzentleri ushın);
— banktiń ishki hújjetlerinde (siyasatında) belgilengen basqa hújjetler, sonıń ishinde, birgelikte kredit alıwshıǵa tiyisli maǵlıwmat hám hújjetler.

Hújjetler 5 jumıs kúninde kórip shıǵıladı.

Tálim krediti shártnaması tólemli kontrakt shártnamasında kórsetilgen bir jıllıq tólem summasına teń muǵdardaǵı summaǵa dúziledi.

Tálim krediti kredit alıwshıǵa Oraylıq banktiń tiykarǵı stavkası muǵdarında ajıratıladı.

Bunda Oraylıq banktiń tiykarǵı stavkası tómenletilgen jaǵdayda, tálim krediti boyınsha procentlik stavkası sáykes túrde tómenleydi, Oraylıq banktiń tiykarǵı stavkası kóterilgen jaǵdayda bolsa, tálim krediti boyınsha procentlik stavkası ózgerissiz qaladı.

Bul tártip:
— sırt el puqaraları hám puqaralıǵı bolmaǵan adamlarǵa;
— kommerciyalıq bankler tárepinen Qor qarjılarınan tısqarı basqa dárekler esabınan beriletuǵın tálim kreditlerine engizilmeydi.

Usı orında qosımsha etiw orınlı, eselengen tólemli kontraktti («super kontrakt») hám onıń minimal muǵdarına teń bolǵan bir mártelik basqa tólemlerdi ámelge asırıw ushın tálim krediti ajıratılmaydı.

Islam Matekov,
NMPI baspasóz xatkeri.