«Super kontrakt» bahaları usı hápteniń aqırında járiyalanadı. Process boyınsha barlıq hújjetler tayın bolǵan, dep jazbaqta «Kun.uz» basılımı Joqarı hám orta arnawlı ministrligine tiykarlanıp.

Oqıwǵa kire almaǵan abiturientler «super kontrakt» bahaların biliw ushın házirgi waqıtta joqarı oqıw orınlarına barıwı shárt emes.

Óytkeni, birinshi gezekte studentlikke usınıs etilgenler, keyin oqıwın kóshiriw boyınsha ótiw balı hám onnan joqarısın alǵan kategoriyadaǵı studentler menen jumıs alıp barıladı.

Oqıwın kóshirgen studentler máselesi tolıq juwmaqlanǵannan soń eselengen tólemli kontrakt («super kontrakt») tiykarında oqımaqshı bolǵanlar ózleri hújjet tapsırǵan joqarı oqıw orınlarına múrájat etiwi múmkin.

Oqıwın kóshiriwde jeterli ball toplay almaǵanlar kategoriyası menen islesiw bolsa 15-sentyabrden keyin baslanadı.

Maǵlıwmat ornında atap ótiw kerek, 2020-jılı «super kontrakt» bahası kúndizgi tálim baǵdarlarında 8,6 million sumnan 279,4 million sumǵa shekem edi. Abiturient toplaǵan ball qansha tómen bolsa, baǵdar qanshelli abıroylı bolsa, «super kontrakt» bahası da kótirilip bara beredi.