ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Joqarı oqıw ornı ishinde yamasa bir aymaq kóleminde oqıwın kóshirgen studentler «super kontrakt» tóley me? Ministrlik wákili juwap berdi

Bir joqarı oqıw ornı ishinde bir baǵdardan ekinshi baǵdarǵa yamasa bir aymaqtaǵı joqarı ornı boyınsha oqıwın kóshirgen studentler bazalıq tólemli kontraktti tóleydi. Bul haqqında Joqarı hám orta arnawlı bilimlendiriw ministrligi bas basqarma baslıǵı Abduvali Xoliqov málim etti, dep jazbaqta «Kun.uz».

«2021-2022-oqıw jılında joqarı oqıw orınlarına oqıwǵa qabıllawdıń mámleketlik buyırtpası parametrleri haqqında»ǵı prezident qararında bir joqarı oqıw ornı ishinde («ishki perevod») yamasa bir aymaq kóleminde kóshiriw haqqında hesh nárse delinbegen. Demek, bul processler Ministrler Kabinetiniń «Joqarı oqıw orınlarına oqıwǵa qabıllaw, studentlerdiń oqıwın kóshiriw, qayta tiklew hám oqıwdan shetletiw tártibi haqqındaǵı rejelerdi tastıyıqlaw haqqında»ǵı qararına muwapıq alıp barılıwı kerek, degen pikirler bar. Usı qararda «super kontrakt» boyınsha gáp bolmaǵanı ushın «ishki perevod»lar bazalıq kontrakt tiykarında ámelge asırıladı, degen pikirler bar.

Bunıń birden-bir tártibin ministrlik, uyımlar menen kelisip, bir hújjet islep shıǵıwdı jobaǵa kirgizdik. Bıyılǵı «ishki perevod»lar hám bir aymaq kóleminde oqıwdı kóshiriw processleri Ministrler Kabinetiniń «Joqarı oqıw orınlarına oqıwǵa qabıllaw, studentlerdiń oqıwın kóshiriw, qayta tiklew hám oqıwdan shetletiw tártibi haqqındaǵı rejelerdi tastıyıqlaw haqqında»ǵı qararına muwapıq alıp barılmaqta. Yaǵnıy, usınday jaǵdaylarda student oqıwın kóshirgende «super kontrakt» emes, bazalıq kontrakt tólemin tóleydi», — degen A.Xoliqov.

Bas basqarma baslıǵı oqıwdı kóshiriw boyınsha jáne bir neshe máselelerge toqtalıp ótken. Atap aytqanda, eger student Ózbekstandaǵı bir aymaqta jaylasqan joqarı oqıw ornınan basqa aymaqtaǵı joqarı oqıw ornına oqıwın kóshirmekshi bolsa hám onıń saylaǵan baǵdarları bir-birinen parqlansa, ol eselengen kontrakt («super kontrakt») tiykarında oqıwın kóshiriwi múmkin. Bunda joqarı oqıw ornı óz imkaniyatları dárejesinde eselengen kontraktti usınıs etedi yamasa tikkeley biykar etiwi múmkin. Baǵdarlar birdey hám keltirilgen sebep tiykarlı bolsa, studenttiń oqıwı bazalıq kontrakt tiykarında kóshiriledi.

«Usı orında studentlerde soraw payda bolmaqta: arza bergen studenttiń jeke kabinetinde oqıwǵa kóshiriliwi usınıs etildi, degen arzalardıń barlıǵı joqarı oqıw ornı tárepinen unamlı túrde kórip shıǵıla ma? Usınıs etildi, degeni joqarı oqıw ornında oqıw kepilligin bermeydi. Ministrlik bıyıl 22 mıńnan aslam arzalardı kórip shıqqan bolsa, 20 mıńnan aslamı usınıs etildi. Qalǵanları hár qıylı sebeplerge baylanıslı biykar etildi.

Ministrlik arzalardı usınıs etkeni menen oqıwın kóshirmekshi bolǵan studentti qabıl etiwshi joqarı oqıw ornınıń juwmaqlawshı qararı kerek. Hújjetler kerekli tártipte jıynalǵanı, talapqa juwap beriwin joqarı oqıw ornı sheshedi», — degen A.Xoliqov.