Joqarı hám orta arnawlı bilimlendiriw ministrligi jańa oqıw jılı ushın respublikalıq joqarı oqıw orınlarında bakalavriat hám magistratura baǵdarları boyınsha tólemli kontrakt muǵdarları boyınsha túsinik berdi.

Ministrliktiń málim etiwinshe, 2020-2021-oqıw jılı basında koronavirus pandemiyası dáwirinde xalıqtı sociallıq jaqtan qorǵaw, atap aytqanda, xalıqtıń tólew qábiletiniń tómenlegenligin esapqa alıp, studentlerdi qollap-quwatlaw maqsetinde bazalıq tólemli kontrakt muǵdarlarına (yaǵnıy, stipendiyasız summaǵa) 10 procentlik muǵdarda shegirme berilgen edi.

2021-jıl 1-fevraldan miynet haqı muǵdarları 10 procentke kóbeytilgen bolsa da, oqıw jılı ushın shegirme berilgen bazalıq kontrakt muǵdarı saqlap qalındı.

Mısal sıpatında alıp qarasaq, pedagogika, texnika, gumanitar pánler tálim baǵdarları boyınsha kúndizgi formada tólemli kontrakt muǵdarı shegirme esabınan 5 771 349 sum etip belgilengen edi. Negizinde bolsa usı baǵdarlarda kontrakt muǵdarı 2020-jıl 1-sentyabrden 6 412 610 sum, 2021-jıl 1-marttan baslap bolsa oqıw jılı ushın belgilengen muǵdarǵa salıstırǵanda 16 procentke joqarı, yaǵnıy 6 733 555 sum muǵdarında bolıwı kerek edi.

Joqarıdaǵılardı esapqa alıp, belgilengen tártipke muwapıq, 2021-jıl 1-sentyabrden baslap 2021-2022-oqıw jılı ushın (stipendiyasız) bazalıq tólemli kontrakt muǵdarları tálim baǵdarlarına qarap 7 759 440 sumnan 11 869 440 sumǵa shekem etip belgilenip, 34,4 procentke kóbeytiliwi kerek edi.

Soǵan qaramastan, Mámleketlik komissiyanıń qabıl etken qararına muwapıq, házirgi waqıtta respublikadaǵı pandemiya sharayatın esapqa alıp, bazalıq tólemli kontrakt muǵdarları haqıyqatında da ornatılıwı kerek bolǵan muǵdarlarǵa salıstırǵanda kemeytilgen muǵdarlarda tastıyıqlandı, yaǵnıy 2021-2022-oqıw jılında tólemli kontrakt muǵdarları 10 procentke kóbeytilmegen, al ornatılıwı kerek bolǵan muǵdarǵa salıstırǵanda 21,1 procentke kem etip belgilengen.

Itibarlı tárepi, bunda koronavirusqa qarsı ıqtıyarlı túrde shanshılǵan kúndizgi tálim baǵdarlarında oqıp atırǵan studentler ushın kontrakt muǵdarı ózgerissiz qaladı.

Máselen, pedagogika, texnika, gumanitar baǵdarlarda oqıp atırǵan studentler stipendiyasız bazalıq tólemli kontrakt summası 10 procentlik muǵdarda shegirme bonusı berilgennen soń 5 771 349 sumdı quraydı.

Rásmiy bildiriwde jazılıwınsha, búgin belgilengen tólemli kontrakt muǵdarları studentti oqıtıw qárejetleriniń tek ǵana ortasha 68,4 procentin quraydı.

Islam Matekov.