Ózbekstan Respublikası Prezidentiniń 2021-jıl 10-apreldegi «II Xalıqaralıq baqsıshılıq kórkem óneri festivalına tayarlıq kóriw hám baqsıshılıq kórkem ónerin rawajlandırıw ushın qolaylı sharayatlar jaratıwǵa baylanıslı qosımsha ilajlar haqqında»ǵı qararına muwapıq, usı jıldıń 17-20-sentyabr kúnleri Nókis qalasında II Xalıqaralıq baqsıshılıq kórkem óneri festivalı bolıp ótpekte.

Házirgi waqıtta Nókis qalasına festival múnásibeti menen kóplegen mámleketlerden baqsılar, turistler hám basqa da miymanlar kelmekte. Bul bolsa dúnya júzinde usı kórkem óner hám elimizge bolǵan qızıǵıwshılar qatarınıń kóbeyip atırǵanınan dárek beredi.

Sońǵı maǵlıwmatlarǵa qaraǵanda, xalıqaralıq festivalǵa dúnyanıń 22 mámleketinen 100 den aslam qatnasıwshı hám miymanlar, sonıń ishinde, YuNESKO, TURKSOY sıyaqlı xalıqaralıq shólkemlerdiń wákilleri, abıroylı miymanlar, jergilikli mádeniy miyras, ilim, kórkem óner hám basqa da tarawlardıń ekspertleri jáne ǵalaba xabar quralları wákilleri kelgen.

Paytaxtımızdaǵı I.V.Savickiy atındaǵı Qaraqalpaq mámleketlik kórkem óner muzeyi átirapındaǵı qıyabanda Ózbekstannıń hár bir wálayatınıń ózine tán milliy úrp-ádet hám dástúrleri, tariyxıy esteliklerin sáwlelendiriwshi kórgizbeli stendleri ornatılǵan. Bul jerde saxnalıq kórinisler, milliy qosıqlar, ayaq-oyınlar, dástanlar atqarılıp, festival miymanları ushın bayram nápesi gezbekte.

Nókis qalasındaǵı oraylıq amfiteatrda II Xalıqaralıq baqsıshılıq kórkem óneri festivalınıń saltanatlı ashılıw máresimi hám koncert baǵdarlaması bolıp ótiwi jobalastırılǵan.

Sonday-aq, 18-sentyabr kúni festival sheńberinde Nókis qalasındaǵı Opera hám baqsıshılıq kórkem óneri mektep-internatında «Baqsıshılıq kórkem óneriniń dúnya mádeniyatı civilizaciyasında tutqan ornı» atamasında xalıqaralıq ilimiy-teoriyalıq konferenciya ótkeriliwi belgilengen. Konferenciyaǵa jergilikli hám sırt elli ilimpazlar, baqsıshılıq kórkem óneriniń tulǵaları qatnasıwı kútilmekte.

18-19-sentyabr kúnleri Nókis qalasındaǵı amfiteatrda Xalıqaralıq baqsıshılıq kórkem óneri tańlawı bolıp ótedi. Tańlawǵa qatnasatuǵın sırt elli hám jergilikli qatnasıwshılardıń qábiletlerin sırt elli hám jergilikli qánigelerden ibarat tóreshiler quramı bahalap baradı.

Sonday-aq, festival sheńberinde qatnasıwshılar hám miymanlar ushın Berdaq atındaǵı Qaraqalpaq mámleketlik akademiyalıq muzıkalı teatrında «Xalıq ushın» milliy operası saxnalastırılıp, Moynaq rayonındaǵı mádeniy miyras obektlerine ekskursiya shólkemlestiriledi.

Festival juwmaǵı hám jeńimpazlardı sıylıqlaw máresimi 20-sentyabr kúni Nókis qalasındaǵı oraylıq amfiteatrda bolıp ótedi.

Islam Matekov,
Karinform.uz.
M.Hábiybullaevtıń túsirgen fotoları.