Bıyılǵı oqıw jılında studentlikke usınıs etilmegen, biraq eselengen tólemli kontrakt («super kontrakt») tiykarında oqıw niyetin bildirgen abiturientler ushın qolaylıqlar jaratıw maqsetinde onlayn tárizde arza jiberiw jáne tólemli shártnamalardı onlayn alıw imkaniyatın beretuǵın https://t-kontrakt.edu.uz málimleme sisteması iske túsirildi. Bul haqqında Joqarı hám orta arnawlı bilimlendiriw ministrligi xabar berdi.

Bul sistema:

– artıqsha áweregershilik hám nemquraydılıqtıń aldın alıw;
– processlerdiń ashıq-aydınlıǵı hám ádilligin támiyinlew;
– elektron arzalardı avtomatlastırılǵan túrde qáliplestiriw;
– tólemli shártnamalardı avtomatlastırılǵan túrde rásmiylestiriw imkaniyatın beredi.

Endi abiturientler joqarı oqıw orınlarına áwere bolıp barıp júriwi shárt emes. Sistema járdeminde olardıń maǵlıwmatları hám toplaǵan balı Mámleketlik test orayınıń bazasınan tikkeley alınıp, elektron kórinistegi arza tiykarında elektron tólemli shártnama avtomatlastırılǵan túrde rásmiylestiriledi.

Esletip ótemiz, usı jıldıń 1-oktyabr sánesi joqarı oqıw orınlarına «super kontrakt» boyınsha arzalardı qabıl etiwdiń eń sońǵı kúni etip belgilengen.

Islam Matekov.