ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Studentlerge ijara tóleminiń bir bólegin tólep beriw tártibi belgilendi

Ózbekstan Respublikası Ministrler Kabinetiniń 2021-jıl 24-sentyabrdegi 605-sanlı qararı tiykarında Mámleketlik joqarı bilimlendiriw mákemeleriniń ijara huqıqı tiykarında jasap atırǵan studentlerine aylıq ijara tóleminiń bir bólegin Mámleketlik byudjet esabınan tólep beriw tártibi haqqındaǵı reje tastıyıqlandı.

Rejege muwapıq, ijara huqıqı tiykarında jasap atırǵan studentlerdiń aylıq ijara tóleminiń bir bólegin tólep beriw mámleketlik salıq xızmeti uyımları tárepinen esapqa alınǵan kóshpes múlk ijara shártnamasına muwapıq ijara huqıqı tiykarında jasaytuǵın arza beriwshilerge engiziledi.

Dizimge alınǵan turaqlı jasaw ornı sheńberinde (rayon, qala kóleminde) arza beriwshilerge aylıq ijara tóleminiń bir bólegin tólep beriw ámelge asırılmaydı.

Bir turaq jayda eki hám onnan aslam student ijara huqıqı tiykarında jasaǵan jaǵdaylarda olardıń barlıǵı ijara shártnamasında dizimge alınǵan bolıwı shárt.

Usı tártip mámleketlik joqarı oqıw ornınıń tek ǵana kúndizgi bilimlendiriw formasında oqıp, ijara huqıqı tiykarında jasaytuǵın studentlerine engiziledi.

Bunda arza beriwshi tiyisli maǵlıwmat yamasa hújjetlerdi ózi oqıp atırǵan fakultet dekanınıń jaslar menen islesiw boyınsha orınbasarı yamasa joqarı oqıw ornınıń studentler turaq jayı menen támiyinlew jumısların muwapıqlastırıwshı bólimine tapsıradı.

Juwapkerler 1 hápte dawamında arza beriwshi maǵlıwmatlarınıń sociallıq ólshemlerge muwapıqlılıǵın úyrenedi.

Soń maǵlıwmatlardı ulıwmalastırıp, kórip shıǵıw hám juwmaq shıǵarıw ushın gezektegi hápteniń birinshi kúninde talabanlardı saylap alıw komissiyasına usınadı.

Komissiya bir jumıs kúninde talabanlar haqqındaǵı maǵlıwmatlardı úyrenip shıǵıp, qarar qabıl etedi.

Usı tiykarda mámleketlik joqarı oqıw ornı rektorı (filial direktorı)nıń buyrıǵı rásmiylestirilip, arzaları qanaatlandırılǵan talabanlar haqqındaǵı tiyisli maǵlıwmatlar hám olardıń dizimi tólemlerdi ámelge asırıw ushın buxgalteriyaǵa usınıladı.

Arzası unamlı sheshilgen studentler ushın ijara tóleminiń bir bólegi Mámleketlik byudjet qarjıları esabınan olar arza bergen sáneden baslap tólep beriledi.

Ijara tóleminiń bir bólegin tólep beriw:

— oqıw jılı dawamında (hár jılı 1-sentyabrden 1-iyulǵa shekem) yamasa oqıtıw baǵdarlaması boyınsha oqıw jılınıń dawamlılıǵına qaray belgilenedi;
— arza beriwshi tárepinen hár aydıń 7-sánesine shekem arzalar juwapkerlerge usınıs etilgeninen soń ámelge asırıladı.

Usı múddetler juwmaqlanǵannan soń berilgen arzalar kórip shıǵılmaydı.

Esletip ótemiz, ijara tóleminiń tólep beriletuǵın bólegi Tashkent qalasında – bazalıq esaplaw muǵdarınıń 1 esesi, basqa aymaqlarda – bazalıq esaplaw muǵdarınıń 0,5 esesinen artıp ketpewi kerek.

Islam Matekov,
Qaraqalpaqstan xabar agentligi.