Ájiniyaz atındaǵı Nókis mámleketlik pedagogikalıq institutı hám Ózbekstan Respublikası Ishki isler ministrliginiń Qaraqalpaq akademiyalıq liceyi arasında óz ara birge islesiw boyınsha jol kartası tastıyıqlanǵan edi.

Usı tiykarda IIM Qaraqalpaq akademiyalıq liceyiniń májilisler zalında NMPI Qabıllaw komissiyasınıń juwaplı xatkeri Polat Kalxanov, Marketing hám studentler ámeliyatı bólimi baslıǵı Polat Xojaniyazov, Málimleme-resurs orayı qánigesi Durya Erlepesova, Oqıw-metodikalıq basqarma qánigesi Damir Xudaynazarovlar akademiyalıq licey jámááti menen ushırasıp, institut hám akademiyalıq licey arasında tastıyıqlanǵan jol kartasınıń maqseti, wazıypaları hám mazmunı haqqında aytıp ótti.

Ushırasıwda institut juwapkerleri sońǵı jıllarda joqarı bilimlendiriw tarawında ámelge asırılıp atırǵan reformalardıń ámeliy nátiyjeleri, qabıllaw kvotalarınıń jıldan-jılǵa kóbeytilip atırǵanı, sonday-aq, institutta zamanagóy bilim hám kónlikpelerdi puqta iyelew ushın jaratılǵan sharayatlar haqqında maǵlıwmatlar berdi.

Ushırasıw soraw-juwaplar, pikir almasıwlar menen dawam etti.