1-oktyabr – Muǵallimler hám ustazlar kúni bayramı elimiz boylap kóterińki ruwxta belgilenbekte. Barlıq bilimlendiriw orınları sıyaqlı Ájiniyaz atındaǵı Nókis mámleketlik pedagogikalıq institutında da mashaqatlı hám maqtanıshlı kásip iyeleri – oqıtıwshı hám ustazlar bayramına arnalǵan saltanatlı ilaj bolıp ótti.

Ilajda institut rektorı Bayrambay Otemuratov eń ullı kásip iyeleri esaplanǵan pedagoglardı bayram menen qızǵın qutlıqlap, elimiz jaslarınıń joqarı bilim alıwı, ilim jolında erisip atırǵan úlken nátiyjeleri menen qutlıqladı, aldaǵı jumıslarında tabıslar tiledi.

Atap ótilgenindey, búgin elimiz rawajlanıwın jańa basqıshqa kóteriw, Úshinshi Renessanstıń tırnaǵın qalaytuǵın jaslardı tárbiyalaw – baslı wazıypalardıń biri. Usınday rawajlanıwǵa tiykar salatuǵın jaslar bolsa, olardıń ilim hám bilimli, joqarı tájiriybeli bolıp jetisiwine tiykar bolatuǵın, álbette, muǵallimler, ustazlar, oqıtıwshılar bolıp esaplanadı.

Sońǵı jıllarda bilimlendiriwdiń barlıq basqıshları sıyaqlı joqarı bilimlendiriwge bolǵan itibar hám ǵamqorlıqlardıń nátiyjesinde elimizde jaslardıń joqarı bilim alıwǵa bolǵan talabı artıp, qabıllaw kórsetkishleri de jıl sayın kóbeytilmekte. Bunda, álbette, joqarı oqıw orınlarında miynet etip atırǵan professor-oqıtıwshılarǵa bolǵan talaptıń da joqarı ekenligi, olardıń miynet haqılarınıń ortasha 25 procentke kóterilgenligi, sonıń menen birge, ilimiy-izertlew jumıslarında joqarı kórsetkishlerge erisip kiyatırǵan pedagoglardı xoshametlew baǵdarında ámelge asırılıp atırǵan jumıslardıń áhmiyeti úlken.

Usınday itibardıń nátiyjesinde Nókis mámleketlik pedagogikalıq institutı kórsetkishleri de jıl sayın joqarılap, respublikamız kóleminde úlgili nátiyjelerge erisilip atırǵanın atap ótiw orınlı. Házirgi waqıtta institutta ulıwma 510 professor-oqıtıwshı keleshek áwladlarǵa ilim-bilim sırların úyretip kiyatırǵan bolsa, sonnan 23 oqıtıwshı ilim doktorı (DSc), 163 i bolsa ilim kandidatları (PhD) esaplanadı. Búgingi kúnge kelip instituttıń ilimiy potencialı 36,5% ti quramaqta.

Bayram ilajında usınday pidayı professor-oqıtıwshılar qatarında bıyılǵı bayram qarsańında instituttıń ózbek ádebiyatı kafedrasınıń professorı Karimbay Qurambaevtıń Prezidentimiz pármanı tiykarında «Fidokorona xizmatlari uchun» ordeni menen, Qaraqalpaqstan Respublikası Joqarǵı Keńesi Prezidiumınıń qararına muwapıq, instituttıń rus tili hám ádebiyatı kafedrasınıń professorı Qutlımurat Qoщanov «Qaraqalpaqstan Respublikasına miyneti sińgen jaslar ustazı» húrmetli ataǵı menen, sonday-aq, dene tárbiyası kafedrasınıń aǵa oqıtıwshısı Azat Kazakovtıń «Watan pidayısı» kókirek belgisi menen sıylıqlanǵanı «Muǵallimler hám ustazlar kúni» bayramına múnásip sawǵa bolǵanlıǵı atap ótildi. Sonıń menen birge, bayram qarsańında doktorlıq dissertaciyaların tabıslı qorǵaǵan, professorlıq, docentlik ataqlarına erisken birneshe professor-oqıtıwshılar ayrıqsha tilge alındı.

Institut rektorı ilajda kóp jıllardan berli tarawda pidayılıq kórsetip, ayanbay miynet etip, joqarı nátiyjelerge erisip kiyatırǵan bir topar professor-oqıtıwshılar, pedagog xızmetkerlerge Joqarı hám orta arnawlı bilimlendiriw ministriniń jeke minnetdarshılıq xatları, húrmet jarlıqların tapsırdı.

Ilajǵa qatnasqan taraw xızmetkerlerine institut rektoratı hám kásiplik awqamınıń húrmet jarlıqları, qımbat bahalı sawǵaları tapsırıldı.

Óz gezeginde, professor-oqıtıwshılar sózge shıǵıp, olardıń jumısların bárqulla esapqa alıp, turaqlı itibar hám ǵamqorlıqlar kórsetip kiyatırǵan elimiz basshılarına minnetdarshılıǵın bildirip, isenimdi ele de aqlaw jolında pidayı xızmet etetuǵınlıǵın bildirdi.

Islam Matekov,
NMPI baspasóz xatkeri.
Avtordıń túsirgen fotoları.