ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Ekinshi hám onnan keyingi qánigelikte oqıw tártibi belgilendi. Qanday ózgerisler bar?

Ózbekstan Respublikası Ministrler Kabinetiniń 2021-jıl 24-sentyabrdegi 606-sanlı qararına muwapıq, Joqarı bilimlendiriw mákemelerinde ekinshi hám onnan keyingi bilimlendiriw tártibi haqqındaǵı reje tastıyıqlandı.

Rejege muwapıq, joqarı maǵlıwmatqa iye bolǵan bakalavr (diplomlı qánige) dárejesine iye adamlar bakalavriat tálim baǵdarları boyınsha ekinshi hám onnan keyingi joqarı bilimdi alıwı múmkin.

Ekinshi hám onnan keyingi joqarı bilimlendiriw boyınsha qabıllaw parametrleri joqarı oqıw orınları tárepinen belgilenedi.

Oqıwǵa kiriw ushın abiturientler hár jılı 10-iyuldan 10-avgustqa shekem (sol kúni de) Joqarı hám orta arnawlı bilimlendiriw ministrligi tárepinen islep shıǵılǵan arnawlı elektron sistema arqalı onlayn tárizde hújjet tapsıradı.

Usı jerde jańalıq sıpatında atap ótiletuǵın tárepi, mámleketlik grant tiykarında oqıǵanlar diplomnıń kóshirmesi menen de hújjet tapsırıwı múmkin boladı. Maǵlıwmat ornında atap ótiw kerek, házirgi waqıtta ámeldegi rejege muwapıq, hújjet tapsırǵanda tek ǵana diplomnıń túp nusqası talap etiletuǵın, bunıń aqıbetinde bolsa mámleketlik grantta oqıǵanlar aradan 3 jıl ótemen degenshe ekinshi qánigelikke hújjet tapsıra almaytuǵın edi.

Qabıllaw tártibi (kiriw imtixanınıń forması, bahalaw kriteriyaları, imtixan ótkeriw múddetleri) hár jılı 1-iyulǵa shekem joqarı oqıw orınlarınıń rásmiy veb-saytında járiyalanadı.

Qabıllaw nátiyjeleri hár jılı 30-avgustqa shekem joqarı oqıw orınları tárepinen járiyalanadı.

Ekinshi hám onnan keyingi joqarı bilimlendiriwde oqıw 2-kurstan baslanadı. Bunda oqıwdıń dawamlılıǵı tiyisli bakalavriat tálim baǵdarları ushın belgilengen múddetten bir jılǵa kem etip belgilenedi.

Reje joqarı áskeriy bilimlendiriw mákemelerine engizilmeydi.

Bul tártip 2022-jıl 1-maydan baslap kúshke kiredi.

Islam Matekov,
Qaraqalpaqstan xabar agentligi.