ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Qaraqalpaqstanda jılıtıw máwsimi 6-oktyabrden baslanadı

Respublikamız aymaǵında hawa rayınıń keskin suwıtıwı, ásirese, túngi waqıtları hawa rayınıń normadan 5-7 gradusqa tómen bolıwı baqlanıp atırǵanına baylanıslı avariyalıq jaǵdaylardıń aldın alıw, sociallıq taraw imaratlarında zárúr temperaturanı saqlaw, tutınıwshılardı ıssılıq energiyası hám jeterli muǵdarda tábiyǵıy gaz benen támiyinlew maqsetinde Qaraqalpaqstan Respublikası aymaǵında 2021-2022-jıllar ushın jılıtıw máwsimi 2021-jıl 6-oktyabrden baslanıwı belgilendi. Bul haqqında QR Ministrler Keńesi málimleme xızmeti xabar berdi.

Bul haqqında QR Ministrler Keńesiniń arnawlı biyligi qabıl etilip, tiyisli taraw basshılarına 2021-2022-jıllar ushın jılıtıw máwsiminde tutınıwshılardı belgilengen tártipte elektr hám ıssılıq energiyası, tábiyǵıy gaz, ishimlik suwı, suyıq hám qattı janılǵı menen turaqlı túrde támiyinlew wazıypaları júklendi.

Maǵlıwmat ornında atap ótiw kerek, ótken jılı respublikamızda jılıtıw máwsimi 10-oktyabrden baslanǵan edi.