ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Jaslar arasında náshebentlik zatlardan paydalanıwdıń aldın alıw, jınayatshılıq hám huqıqbuzarlıqlar profilaktikasına arnalǵan ushırasıw bolıp ótti

Búgin, 12-oktyabr kúni Ájiniyaz atındaǵı Nókis mámleketlik pedagogikalıq institutında jaslar arasında náshebentlik hám psixotrop zatlardan paydalanıwdıń aldın alıw, jınayatshılıq hám huqıqbuzarlıqlar profilaktikasına arnalǵan ushırasıw bolıp ótti.

Ushırasıwdı instituttıń ruwxıy-aǵartıwshılıq hám jaslar máseleleri boyınsha prorektorı Q.Qadirov ashıp berdi hám basqarıp bardı.

Ilajǵa Ózbekstan Respublikası Ministrler Kabineti janındaǵı náshebentlik zatlardı qadaǵalaw orayı bólim baslıǵı M.Óteniyazov, Ózbekstan Respublikası Ishki isler ministrligi jınayat-izlew bas basqarması bólim baslıǵı A.Matlyubov, usı basqarma xızmetkerleri F.Azgarov, Sh.Juraev, Qaraqalpaqstan Respublikası Ishki isler ministrligi Jınayat izlew basqarması baslıǵınıń orınbasarı N.Ádilbekov, usı basqarma xızmetkerleri A.Táńirbergenov, X.Yuldashev, Qaraqalpaqstan Respublikası Narkologiyalıq dispanseri narkolog-shıpakeri B.Qayıpnazarov, sonday-aq, Qaraqalpaqstan Respublikası musılmanları qazıyatınan A.Jolawshiev hám institut professor-oqıtıwshıları jáne studentler qatnastı.

Ushırasıwda taraw wákilleriniń atap ótiwinshe, házirgi waqıtta respublikamız boylap náshebentlik hám psixotrop zatlardıń sawdası menen baylanıslı jınayatlardıń aldın alıw boyınsha tiyisli jumıslar alıp barılıp atırǵanına qaramastan, tilekke qarsı, bunday jınayatlarda jaslardıń qatnasıw jaǵdayları da ushırasıp turıptı. Bul bolsa usı baǵdardaǵı profilaktikalıq jumıslardı ele de kúsheytiwdi talap etpekte.

Házirgi waqıtta ayrım jaslar arasında náshebentlik zatlar, sonday-aq, quramında psixotrop zatlar bolǵan dárilerdi bilip-bilmey qabıllap, keyin ala olarǵa úyrenip qalıp atırǵan jaǵdaylar ushırasıp turıptı. Ásirese, óz úylerinen, ata-anasınan uzaqta, kvartirada jasap atırǵan studentler arasında bunday jaǵdaylardı boldırmaw kúnniń baslı wazıypalarınıń birinen bolıp tabıladı.

Bunday zıyanlı zatlar respublikamızǵa nızamǵa qayshı aylanba jollar arqalı kirip kelip atırǵanı, sonıń menen birge, internet tarmaqları arqalı nızamsız sawdalarınıń bolıp atırǵanı, jaslardıń olardan saqlanıwı boyınsha profilaktikalıq kónlikpeler berildi.

Ásirese, bunda eń dáslep hár bir studenttiń psixologiyalıq jaǵdayın jaqsılap, náshebentlik hám psixotrop zatlar haqqındaǵı bilimlerin arttırıw, bul arqalı olarda usı zatlardıń zıyanlı aqıbetleri haqqında túsinik jáne oǵan qarsı psixologiyalıq immunitet payda etiw bunday illetlerge qarsı gúresiwdegi eń nátiyjeli jol ekenligi atap ótildi.

Sonıń menen birge, islam dininiń muqaddes kitabı – «Quranı káriym»de hám hádislerde bunday zatlardı qabıllaw, paydalanıwdıń sháriyatqa qayshı keliwi, insan kámillikke erisiw ushın nelerge áhmiyet qaratıwı kerekligi boyınsha maǵlıwmatlar berildi.

Taraw qánigeleri tárepinen jaslardıń náshebentlik hám psixotrop zatlarǵa úyrenip qalıwına biologiyalıq, psixologiyalıq hám sociallıq faktorlar tásir etip atırǵanı, olarǵa qarsı gúresiw baǵdarında alıp barılıp atırǵan jumıslar haqqında maǵlıwmatlar berildi.

Ilaj professor-oqıtıwshılar, student-jaslar hám taraw qánigeleriniń soraw-juwapları menen dawam etti.

NMPI baspasóz xızmeti.