Ázerbayjan Respublikasınıń Ózbekstandaǵı elshixanası janındaǵı Haydar Aliev atındaǵı Ázerbayjan mádeniyatı orayınıń baslaması menen 20-21-oktyabr kúnleri Nókis qalasında Ázerbayjan mádeniyatı hám ádebiyatı kúnlerin ótkeriw jobalastırılǵan.

QR Turizm hám sport bas basqarması málimleme xızmetiniń xabar beriwinshe, 28 adamnan ibarat bolǵan delegaciya aǵzaları 20-oktyabr kúni Nókis xalıqaralıq aeroportında saltanatlı túrde kútip alınadı.

Eki kúnlik ilaj sheńberinde Qaraqalpaqstan Respublikası tariyxı hám mádeniyatı muzeyinde telekórsetiwdi súwretke alıw, I.V.Savickiy atındaǵı Qaraqalpaq mámleketlik kórkem óner muzeyine sayaxat, delegaciya aǵzalarınıń respublikamız húkimeti aǵzaları menen ushırasıwı, Berdaq atındaǵı Qaraqalpaq mámleketlik akademiyalıq muzıkalı teatrında Ázerbayjan mádeniyatı hám ádebiyatı kúnleriniń ashılıw máresimi hám koncert baǵdarlaması, Ájiniyaz atındaǵı Nókis mámleketlik pedagogikalıq institutında «Haydar Aliev atındaǵı Ázerbayjan ádebiyatı oshaǵı» múyeshiniń ashılıwı hám oqıwshılar jáne studentler menen ushırasıwlar ótkeriliwi jobalastırılǵan.