ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Institutta «Xalıqaralıq keńpeyillik kúni» keń túrde belgilendi

Xalıqaralıq YUNESKO shólkemi dúnyada tınıshlıq, dinler hám konfessiyalar aralıq baylanıslardı ornatıw, milletler hám xalıqlar arasında birge islesiwdi rawajlandırıw baǵdarında bir neshe jumıslardı ámelge asırıp, xalıqlar arasındaǵı keńpeyillik boyınsha 70 den aslam xalıqaralıq hújjetlerdi qabıl etken.

Olardıń biri sıpatında 1995-jıl 16-noyabrde Parij qalasında ótkerilgen YUNESKO Bas konferenciyasınıń 28-sessiyasında járiyalanǵan «Keńpeyillik principleri deklaraciyası»n atap ótiw orınlı. Házirgi waqıtta bul kún dúnya júzinde «Xalıqaralıq keńpeyillik kúni» sıpatında keń túrde belgilenedi.

Ájiniyaz atındaǵı Nókis mámleketlik pedagogikalıq institutında usı sáne múnásibeti menen bolıp ótken kórkem-ádebiy keshede sózge shıqqanlar jıynalǵanlardı qutlıqlap, házirgi waqıtta elimizdiń tınıshlıǵı, xalqımızdıń paraxatshılıǵı, abadan turmısın támiyinlew, diniy keńpeyillik, milletler aralıq doslıqtı bekkemlew baǵdarında ámelge asırılıp atırǵan jumıslar haqqında atap ótti.

Prezidentimiz basshılıǵındaǵı elimizdi rawajlandırıwdıń bes tiykarǵı baǵdarı boyınsha Háreketler strategiyasında da milletler aralıq tatıwlıq, keńpeyillik sıyaqlı ulıwma insanıylıq qádiriyatlar ulıǵlanǵanlıǵı bul baǵdarda mámleketimizdegi xalıqlardıń doslıǵı hám biradarlıǵın ayqın kórsetpekte.

Házirgi waqıtta institutta 10 nan aslam millet wákilleri oqıp atırǵan bolıp, xalıqlar, milletler arasındaǵı doslıq ortalıǵın bekkemlewde alıp barılıp atırǵan jumıslar haqqında ayrıqsha atap ótildi.

Keshe instituttıń qábiletli student jaslarınıń atqarıwındaǵı doslıq, biradarlıqtı jırlaytuǵın qosıq hám ayaq-oyınlar orın alǵan koncert baǵdarlaması menen dawam etti.

NMPI baspasóz xızmeti.