ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

NMPI voleybol komandası Ózbekstan superkubogınıń birinshi kúngi jarısında jeńiske eristi

Aldın xabar bergenimizdey, búgin, 19-noyabr kúni Tashkent wálayatınıń Almalıq qalasındaǵı «Metallurg» sport kompleksinde voleybol boyınsha Ózbekstan superkubogı jarısları baslandı.

Hayal-qızlar arasında ótkerilgen dáslepki kúngi jarısta Ózbekstan kubogı jeńimpazı Ájiniyaz atındaǵı Nókis mámleketlik pedagogikalıq institutınıń «NMPI» qızlar saylandı komandası Ózbekstan chempionı, ázeliy qarsılası bolǵan Ózbekstan mámleketlik dene tárbiya hám sport universitetiniń «SKUF» komandasına qarsı oynadı.

Quwanıshlısı, búgingi jarısta Ájiniyaz atındaǵı Nókis mámleketlik pedagogikalıq institutınıń «NMPI» qızlar saylandı komandası qarsılasların 3:1 esabında jeńip shıqtı.

Ekinshi kúngi jarıs erteń, 20-noyabr kúni ótkeriliwi belgilengen.

Esletip ótemiz, oyınlar eki jeńiske shekem dawam etedi. Eger dáslepki eki oyında Ózbekstan superkubogı qarama-qarsılıǵınıń jeńimpazı anıqlansa, sońǵı úshinshi oyın ótkerilmeydi hám jarıs toqtatıladı.

Eger dáslepki eki oyınnan soń kúshler teń kelip qalsa, superkubok jeńimpazı sońǵı úshinshi kúngi oyında anıqlanadı. Usı superkubok jarısları menen Ózbekstanda bıyılǵı jılǵı voleybol máwsimi óz juwmaǵına jetedi.

Biz óz gezeginde «NMPI» qızlar saylandı komandasına superkubok jarıslarınıń ekinshi kúninde de áwmet yar bolıwın tileymiz!

NMPI baspasóz xızmeti.