Aldın xabar bergenimizdey, usı jıldıń 19-20-noyabr kúnleri Tashkent wálayatınıń Almalıq qalasındaǵı «Metallurg» sport kompleksinde voleybol boyınsha Ózbekstan superkubogı jarısları bolıp ótti.

Hayal-qızlar arasında eki kún dawam etken jarısta Ózbekstan kubogı jeńimpazı Ájiniyaz atındaǵı Nókis mámleketlik pedagogikalıq institutınıń «NMPI» qızlar saylandı komandası Ózbekstan chempionı, ázeliy qarsılası bolǵan Ózbekstan mámleketlik dene tárbiya hám sport universitetiniń «SKUF» komandasına qarsı oynadı.

Jarıstıń dáslepki kúni Ájiniyaz atındaǵı Nókis mámleketlik pedagogikalıq institutınıń «NMPI» qızlar saylandı komandası qarsılasların 3:1 esabında jeńip shıqqan bolsa, búgin, 20-noyabr kúni bolıp ótken jarıstıń ekinshi kúninde de «SKUF» komandası qızlarına hesh qanday imkaniyat qaldırmadı – esap 3:0.

– Elimizde sporttı rawajlandırıw, ósip kiyatırǵan jas áwlatdı kámil insan etip tárbiyalaw, jas sportshılardı hár tárepleme qollap-quwatlawǵa qaratılıp atırǵan ayrıqsha itibar nátiyjesinde jaslarımız respublikalıq hám xalıqaralıq sport jarıslarında jeńislerge erispekte. Usı jıldıń mart ayında Qaraqalpaqstan Respublikası Joqarǵı Keńesiniń Baslıǵı Murat Kamalov hám Ministrler Keńesiniń Baslıǵı Qaxraman Sarievler sportshı qızlarımız benen ushırasıp, olardıń qolǵa kirgizip atırǵan tabısları menen qutlıqlap, sawǵalar tapsırıp, aldaǵı bolatuǵın jarıslarda joqarı nátiyjelerge erisiwi ushın barlıq zárúr sharayatlardı jaratıp beriwi usınday jeńislerge erisiwimizde áhmiyetli bolmaqta, – deydi Qaraqalpaqstanǵa miyneti sińgen trener, «Watan pidayısı» kókirek belgisiniń iyesi, sport veteranı Azat Kazakov.

Solay etip, Ájiniyaz atındaǵı Nókis mámleketlik pedagogikalıq institutınıń «NMPI» qızlar saylandı komandası voleybol boyınsha bıyılǵı jılǵı Ózbekstan superkubogı jeńimpazı bolıp, absolyut chempionlıqqa erisken edi.

Maǵlıwmat ornında atap ótiw kerek, «NMPI» qızlar saylandı komandası voleybol boyınsha ótken jılǵı máwsimde de Ózbekstan chempionatı hám superkubogı jarıslarında jeńiske erisip, absolyut chempionlıqtı qolǵa kirgizgen edi.

Islam Matekov,
NMPI baspasóz xatkeri.