Tashkent qalasında qılıshpazlıq boyınsha jaslar arasında Jáhán kubogı jarısları bolıp ótti. Qızlar arasında sablya baǵdarı boyınsha ótkerilgen komandalıq jarısta Ózbekstan saylandı komandası 1-orındı iyeledi.

Quwanıshlısı, saylandı komanda quramında Qaraqalpaqstan Respublikasınan Ájiniyaz atındaǵı Nókis mámleketlik pedagogikalıq institutı akademiyalıq liceyiniń oqıwshısı Gúlistan Perdebaeva tiykarǵı quramda túsip, Jáhán kubogınıń altın medalın qolǵa kirgiziwge múnásip úlesin qostı.

Dáslep Egipet komandasın 45:21 esabında jeńip shıqqan qızlarımız yarım finalda bolgariyalı qarsılasların 45:36 esabında jeńdi. Finalda kútilgenindey Ózbekstan hám Rossiya jasları altın medallar ushın jarısqa tústi. Keskin hám qızǵın ótken jarısta qızlarımız 45:36 esabında jeńiske erisip, Jáhán kubogınıń altın medalların qolǵa kirgizdi.

Maǵlıwmat ornında atap ótiw orınlı, NMPI akademiyalıq liceyiniń oqıwshısı Gúlistan Perdebaeva qılıshpazlıqtıń sablya baǵdarı boyınsha respublikalıq hám xalıqaralıq jarıslarda joqarı nátiyjelerdi kórsetip kiyatırǵan úmitli sportshılarımızdan biri bolıp tabıladı.

NMPI baspasóz xızmeti.