Aldın xabar bergenimizdey, usı jıldıń 19-20-noyabr kúnleri Tashkent wálayatınıń Almalıq qalasındaǵı «Metallurg» sport kompleksinde voleybol boyınsha Ózbekstan superkubogı jarısları bolıp ótti.

Hayal-qızlar arasında eki kún dawam etken jarısta Ózbekstan kubogı jeńimpazı Ájiniyaz atındaǵı Nókis mámleketlik pedagogikalıq institutınıń «NMPI» qızlar saylandı komandası Ózbekstan chempionı, ázeliy qarsılası bolǵan Ózbekstan mámleketlik dene tárbiya hám sport universitetiniń «SKUF» komandasına qarsı oynadı. «NMPI» qızlar saylandı komandası qarsılasların dáslepki oyında 3:1 esabında jeńip shıqqan bolsa, jarıstıń ekinshi kúninde de «SKUF» komandası qızlarına hesh qanday imkaniyat qaldırmay 3:0 esbında jeńip, voleybol boyınsha bıyılǵı jılǵı Ózbekstan superkubogı jeńimpazı bolıp, absolyut chempionlıqqa eristi.

Qaraqalpaqstanǵa miyneti sińgen trener, «Watan pidayısı» kókirek belgisiniń iyesi, sport veteranı Azat Kazakov bashılıǵındaǵı «NMPI» qızlar saylandı komandası búgin, 23-noyabr kúni Nókis temir jol vokzalında saltanatlı túrde kútip alındı.

Ilajǵa respublikamız sport tarawı wákilleri hám institut jámááti qatnastı.