Institutımızdıń qazaq tili hám ádebiyatı kafedrası professor-oqıtıwshıları – kafedra baslıǵı docent Í.Quttımuratova, docent T.Tórtkúlbaeva hám assistent-oqıtıwshı Ǵ.Mambetkarimovlar qánigeler jetilistirip shıǵarıwshı kafedralar hám ulıwma orta bilimlendiriw mektepleri arasındaǵı óz ara baylanıstı jolǵa qoyıw maqsetinde Ellikqala rayonlıq XXBge qaraslı alıs aymaqta jaylasqan Shuqırqaq awılındaǵı 33-sanlı mektebine barıp, mektep jámááti hám oqıwshı jasları menen ushırasıw ótkerdi.

Ushırasıw barısında mektepte oqıw tiykarınan qazaq tilinde alıp barılatuǵının esapqa alıp, usı mektepte qazaq tili hám ádebiyatı kafedrası filialın hám qazaq tili hám ádebiyatı kabinetin shólkemlestiriw, onı házirgi zaman talaplarına sáykes bezew hám mekteptegi qazaq tili hám ádebiyatı páni muǵallimleri menen birge islesiwdi jolǵa qoyıp, olarǵa metodikalıq jaqtan járdem beriw, pitkeriwshi klass oqıwshıların kásipke baǵdarlaw boyınsha birqansha jumıslardı ámelge asırıw maqsetinde jaqın keleshektegi on jılǵa mólsherlengen eki tárepleme shártnamaǵa qol qoyıldı. Eki tárep ámelge asırılǵan jumıslardıń nátiyjesin hár sherekte ushırasıw ótkerip, dodalap barıw minnetlemesin kelisip aldı.

Ushırasıwǵa 33-sanlı ulıwma orta bilim beriw mektebi direktorı K.Túrkmenbaev hám direktordıń oqıw isleri boyınsha orınbasarı R.Biljanovalar qatınasıp, eki tárepleme shártnama talapların qollap-quwatladı. Mekteptiń joqarǵı klass oqıwshıları da institut professor-oqıtıwshılarına ózlerin oylandırǵan sorawlardı berip, sáwbetlesti. Ushırasıw sońında kafedra oqıtıwshıları ózleriniń baspadan shıǵarılǵan kitapların mektep kitapxanasına eki tárepleme birge islesiwdiń belgisi esabında sawǵa etti.