Búgin, 4-dekabr kúni erte azannan baslap paytaxtımız Nókis qalası átirapındaǵı qumlı jerlerge shólge shıdamlı ósimlik esaplanatuǵın seksewil nálleri otırǵızıldı.

Prezidentimiz baslaması menen mámleketimizde ana tábiyatımızdı qorǵaw, jasıl toǵaylıqlardı kóbeytiw, ekologiyalıq turaqlılıqqa erisiw maqsetinde elimiz boylap dawam etip atırǵan «áhmiyetli 40 kúnlik» sheńberinde ótkerilgen ekologiyalıq akciyaǵa Ájiniyaz atındaǵı Nókis mámleketlik pedagogikalıq institutı jámááti jáne student-jasları da belsene qatnastı.

Xabarıńız bar, mámleketimiz basshısı Sh.Mirziyoevtiń baslaması menen Aral teńiziniń suwı tartılǵan aymaqlarında 2018-jıldan berli «jasıl qaplamalar» qorǵanıw toǵaylıqların payda etiw boyınsha keń kólemli tariyxıy jumıslar alıp barılmaqta. Bıyılǵı jılǵa shekem ulıwma 1,6 million gektar maydanda «jasıl qaplamalar» payda etilgen bolsa, kelesi bes jıllıqta da bunday jumıslar dawam ettirilip, Aralboyı aymaqlarında 1 million gektarǵa shól ósimliklerin egiw jobalastırılǵan.

— Elimizde «áhmiyetli 40 kúnlik» sheńberinde ekologiyalıq hám klimatlıq sharayatlardı esapqa alǵan halda terek hám shólge shıdamlı basqa da ósimlik nállerin otırǵızıw jumısları qızǵın ruwxta dawam etpekte. Ájiniyaz atındaǵı Nókis mámleketlik pedagogikalıq institutı professor-oqıtıwshıları, studentleri hám barlıq xızmetkerleri usı akciya sheńberinde ayrıqsha belsendilik kórsetip, usı kúnge shekem 12 mıńǵa shamalas terek nállerin otırǵızıwǵa eristik. Usı baǵdardaǵı jumıslarımız, álbette, ele de dawam etedi. Óytkeni, bunıń barlıǵı búgingi hám keleshek áwladlarǵa úlgili jumıslar bolıp, ekologiyalıq mashqalalardıń aldın alıwǵa óz tásirin tiygiziwi sózsiz, — deydi NMPI jaslar máseleleri hám ruwxıy-aǵartıwshılıq isleri boyınsha prorektorı Q.Qodirov.

Nókis qalası átirapında qum háreketleriniń aldın alıw, qum boranlarınıń unamsız tásirin saplastırıw maqsetinde «Jasıl belbew» payda etiw jumısları dawam etedi.

Islam Matekov,
NMPI baspasóz xatkeri.
Avtordıń túsirgen fotoları.